iklan

NASIONÁL, EKONOMIA, HEADLINE, POLÍTIKA

Aviaun Aero Dili sei realiza vou komersiál dahuluk iha 28 marsu

Aviaun Aero Dili sei realiza vou komersiál dahuluk iha 28 marsu

Prezidente Repúblika, José Ramos Horta akompaña hosi emprezáriu Lourenço de Oliveira, no nia espoza Albertina Neves, hosi Ministru Transporte no Komunikasaun, José Agostinho da Silva, no Prezidente Konsellu Administrasaun BNCTL, António Vitor, tesi fita hodi inaugura aviaun komersiál Aero Dili Timor-Leste A230, iha Aeroportu Internasionál Prezidente Nicolau Lobato, Comoro, Dili, segunda (20/03). Imajen Tatoli/Francisco Sony

DILI, 20 marsu 2023 (TATOLI) – Prezidente Repúblika (PR), José Ramos Horta, akompaña husi Ministru Transporte no Komunikasaun (MTK), José Agustinho da Silva, Diretór-Ezekutivu empreza Aero Dili, Lourenço de Oliveira, no espoza, halo inaugurasaun ba aviaun Aero Dili ho marka A320, iha Aeroportu Internasionál Prezidente Nicolau Lobato (AIPNL), Comoro. Aviaun ho bandeira Timor-Leste ne’e sei semo dahuluk iha loron 28 marsu ne’e.

“Parabeniza emprezáriu timoroan Lourenço Oliveira ho nia família tomak. Ha’u orgullu tanba iha mehi ne’ebé boot tebtebes ba Timor-Leste, mehi ne’e realiza duni. Ha’u hakarak husu de’it ba Governu atu halo dekretu-lei ida hodi apoia ba Aero Dili”, Horta hatete iha ámbitu inaugurasaun aviaun Aero Dili ne’ebé to’o ohin iha AIPNL.

Sorin seluk, Ministru Transporte no Komunikasaun , José Agustinho da Silva, afirma inagurasaun ba aviaun Aero Dili nu’udar momentu ida importante tebes ba empreza refere, ne’ebé mak brani koopera ho empreza estranjeira hodi opera aviaun ida ne’e.

“Segunda dadeer aviaun Aero Dili tn iha Aeroportu Internasionál Comoro, ne’e hatudu katak setór privadu iha Timor-Leste bele kompete ho airlines sira hosi rai-li’ur ne’ebé durante ne’e fasilita populasaun halo movimentu uza meiu transporte aéreu. Governu liuhosi Ministériu Transporte fó oportunidade ba empreza aérea sira, liuliu setór privadu atu kompete  iha konetividade aérea”, ministru dezafia.

Ekipa Bombeiru rega hela bee ba Aviaun komersiál Aero Dili Timor-Leste A230 Airbus, bainhira atrera dahuluk, iha Aeroportu internasionál Prezidente Nicolau Lobato, Comoro, Dili, segunda (20/03). Imajen Tatoli/Francisco Sony

Tuir governante ne’e, AIPNL nu’udar odamatan boot ba konetividade aérea, ne’e duni Governu fó prioridade atubele kompete hodi hamoris setór turizmu.

Diretór-Ezekutivu Aero Dili, Lourenço de Oliveira, dehan aviaun ne’e to’o ona iha Dili liuhosi prosesu ne’ebé mak naruk no interresante tebes, motivadu hosi nesesidade ida atu harii rasik kompañia aérea ida ne’e.

“Aviaun ida ne’e timoroan rasik mak sei ka’er. Durante tinan 20 nia laran ha’u haree, apreende, envolve-aan mós iha indústria no forma tiha oinsá kompañia aérea hosi nasaun rua ka tolu ne’ebé halo operasaun iha Timór. Hosi esperiénsia hirak ne’e ha’u sente katak tempu to’o ona atu kria oportunidade hodi hatudu katak timoroan mós bele. Hosi kuriozidade sira ne’e ha’u deside atu hahú operasaun ba aviaun ki’ik ho motivu iha loron ida bele to’o aviaun boot”, Lourenço haktuir.

Diretór-Ezekutivu Aero Dili, Lourenço de Oliveira. Imajen Tatoli/Francisco Sony

Tanba ne’e, durante tinan lima nia laran empreza Aero Dili serbisu maka’as no aprende barak atubele hatán ba pergunta ida ‘tanba sá mak labele’, reposta lubun boot ne’ebé empreza hetan maibé resposta boot liu mak tenke investe iha rekursu umanu.

Ho dezafiu sira ne’e Aero Dili deside atu investe ba rekursu umanu ho pozisaun xave sira iha Aero Dili laran rasik, nomós ba pesoál hosi instituisaun públika relevante no buka nafatin atu koadjuva malu durante fulan-16 hodi prepara kondisaun hotu atubele halo operasaun ba aviaun boot.

“Maski hasoru obstákulu barak, maibé espíritu reziliénte timoroan nian sempre domina, hodi labele para de’it iha dalan klaran”, nia afirma.

Aviaun komersiál Aero Dili Timor-Leste A230 to’o iha Aeroportu Internasionál Prezidente Nicolau Lobato, Comoro, Dili, segunda (20/03). Imajen Tatoli/Francisco Sony

Responsável Aero Dili ne’e esplika folin billete tuir de’it merkadu daudaun nian no karik iha ajuda ruma hosi Governu ba empreza konserteza presu billete sei baratu.

“Prezidente Repúblika husu atu Governu tulun Aero Dili. Ha’u bele dehan katak folin billete sei baratu ba ita-nia povu, tanba Governu ajuda ona, maibé ita nafatin tau presu ho folin laiha mudansa ne’e ita sala, ita laran laiha ba ita-nia maluk timoroan rasik”, nia dehan.

Antes ne’e Aero Dili inaugura ona ligasaun aérea ba dahuluk entre Dili-Bali (Indonézia) iha 23 janeiru. Aviaun ne’e ho totál kadeira hamutuk 162 kompostu hosi kadeira ualu ba primeira klase.

Notísia relevante : https://tatoli.tl/2023/01/23/aero-dili-lansa-rota-aerea-internasional-taur-husu-faan-billete-ho-presu-razoavel/

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!