Ekipa nomeasaun hosi PM hahú halo avaliasaun ba proposta 333 iha SASCAS
DILI, 20 marsu 2023 (TATOLI)—Ekipa nomeiasaun hosi Primeiru Ministru (PM), Taur Matan Ruak, segunda ne’e, hahú hala’o avaliasaun ba pre-selesaun proposta hamutuk 333 ne’ebé mak tama iha Servisu Apoiu Sosiedade Sivíl no Auditória Sosiál iha Gabinete Primeiru Ministru (SASCAS-PM).
Ekipa ne’ebé hetan nomeasaun hosi Primeiru Ministru mai hosi Ministeriu Saúde (MS), Ministeriu Agrikultura no Peska (MAP), Ministeriu Edukasaun, Konsellu Kombatente Libertasaun Nasional (CCLN,sigla portugés), Forum Organizasaun Naun Governamentál Timor-Leste (FONGTIL), Konsellu Diretiva Rede Nasional Auditoria Sosiál (KD-RENAS), Asia Justice and Rights (AJAR), Asosiasaun Defisiente Timor-Leste (ADTL) no ekipa juri permanente na’in 13 no suplente na’in ualu.
Diretór Ezekutivu SASCAS-PM, Edvin Duarte Soares Noronha, hateten, ekipa nomeiasaun ne’e hahú halo avaliasaun ba proposta sira tanba diskusaun no debate ne’ebé antes ne’e hala’o iha Parlamentu Nasional (PN) konsege aprova orsamentu apoia ba sosiedade sivíl hamutuk milliaun $8 ba funsionamentu servisu inklui mós orsamentu ba transparénsia públika. No orsamentu ne’ebé mak atu apoia ba organizasaun sosiedade sivíl kuaze milliaun $7, no iha mós orsamentu ne’ebé maka aprova iha PN ba konstrusaun Monumentu saudozu Francisco Xavier do Amaral nian iha Turiscai.
“PN mós aprova orsamentu ba sosiedade sivíl ho grupu komunitária sira milliaun $1, konfisoens relijiozu naun- katólika milliaun $2, organizasaun rezisténsia milliaun $1,6, servisu auditoria sosiál ho valor $170.000. Nune’e, ekipa sei halo avaliasaun ba proposta sira ho objetivu proposta na’in sira bele hetan subvensaun hosi SASCAS,” Edvin Duarte Soares Noronha, dehan liuhosi nota komunikadu ne’ebé Agência Tatoli, asesu segunda ne’e.
Nia dehan, hafoin orsamentu aprova iha Parlamentu Nasional, SASCAS iha knaar ida mak aprezenta pedidu despeza ba Primeiru Ministru tanba SASCAS autónomu iha nia administrasaun no finansa maibé irarkiamente servisu ne’e tutela ba PM. Tanba ne’e tenke aprezenta ninia orsamentu ba iha Primeiru Ministru hodi husu autorizasaun Global ba orsamentu ne’ebé atu gasta.
Nia hateten, orsamentu apoia ba sosiedade sivíl ne’e haree ba liña setoral hamutuk 15 hanesan liga ba agrikultura, ortikultura, pekuária, saúde públiku, turizmu, relijiozu, rezisténsia, auditoria sosiál, inklui infraestrutura báziku hosi liña setorál ho ida ne’e proposta hamutuk 333 mak tama ona iha SASCAS.
“Atu fó hanoin filafali ba iha públiku katak, avaliasaun ba proposta hamutuk 333 ne’ebé mak daudauk ne’e tama iha SASCAS-PM, ha’u sei la halo intervensaun, maibé entrega tomak kompeténsia ba iha ekipa nomeasaun hosi PM mak hala’o nia servisu durante semana ida,” nia hateten.
Jornalista : Arminda Fonseca
Editora : Armandina Moniz
