DILI, 20 marsu 2023 (TATOLI)-Prezidente Repúblika (PR), José Ramos Horta, segunda ne’e, fó ona tomada pose ba Embaixadór Timor-Leste dezignadu ba Reinu Unidu, João Paulo da Costa Rangel ho ninia mandatu durante tinan tolu.
“Ohin, ita mai asiste tomada pose ba ita-nia Embaixadór foun ba Reinu Unidu Inglaterra, João Paulo da Costa Rangel, ne’ebé mak iha semana balun nia laran sei bá Inglaterra hodi asume nia funsaun foun hanesan Embaixadór,” Ministra Negósiu Estranjeiru no Kooperasaun (MNEK), Adalzija Magno, hateten ba jornalista sira iha Palásiu Prezidensiál, Bairru Pite.
Notísia Relevante :Prezidente Repúblika fó pose ba embaixadór dezignadu sira
Nia hateten Inglaterra hanesan nasaun ida importante ba ita liliu iha parte konsulár tanba timoroan barak tebes hela iha ne’ebá hodi buka moris.
No Inglaterra importante mós ba Timor-Leste tanba nu’udar nasaun membru ida P5 ka (The permanent members of the United Nations Security Council) kompostu hosi China, France, Russia, the United Kingdom, and the United States no Inglatera mós nu’udar nasaun ida influénsia iha mundu no riku.
“Depois ita iha relasaun istórika lubun ho rai ne’e, entaun ita sente obrigadu mantein ita-nia relasaun di’ak ho Inglaterra,” Governante ne’e hateten.
Ho nune’e, Ministra Negósiu Estranjeiru no Kooperasaun ne’e hein katak ho prezensa Embaxadór dezignadu ba Reinu Unidu ne’e bele hala’o nia kna’ar hanesan ita hotu hakarak liliu atu fó protesaun ba sidadaun timoroan sira iha nasaun ne’ebá.
Durante serimónia tomada pose ne’e la’o, Xefe Estadu hato’o ninia mensajen ba Embaixadór dezignadu atu mantein lasu amizade ho Inglaterra ne’ebé maka la’o ona durante tinan barak nia laran.
Embaixadór, João Paulo da Costa Rangel, agradese ba Governu liuhosi Ministériu Negósiu Estranjeiru no Kooperasaun tanba sira-nia konfiansa hodi nomea nia hodi asume kargu embaixadór Reuni Unidu.
Relasaun Timor-Leste ho Inglaterra importante tebes iha polítikamente no diplomátika no iha mós relasaun entre povu ho povu tanba durante ne’e maluk timoroan barak servisu iha Reinu Unidu hodi apoiu ekonómia nasaun Timor-Leste nian.
“Protesaun konsolár ba ita-nia sidadaun sira iha Reinu Unidu sei haree tempu badak óinsa besik liu tan ho dignu sai prioridade” nia hateten.
Notísia Relevante :Jorge Trindade asume tan kargu nu’udar Embaixadór TL ba nasaun haat
Jornalista: Nelson de Sousa
Editór: Agapito dos Santos
