DILI, 21 marsu 2023 (TATOLI)-Prezidente Repúblika, José Ramos Horta, promete sei haruka relatóriu hosi Alumni Parlamentu Foinsa’e Timor-Leste (APFTL) ba Governu hodi fó atensaun liga ho problema ne’ebé joven sira enfrenta iha área edukasaun.
“Prezidente Repúblika orgullu ho dokumentu no rekomendasaun sira ne’ebé prodús husi Parlamentu Foinsa’e nian sei enkamina ba liña ministeriál sira atu bele tau iha sira-nia polítika,”Prezidente Meza plenária daruak Parlamentu Foinsa’e, Celina Saores Franclin, hateten ba jornalista sira hafoin ramata enkontru ho Xefe Estadu iha Palásiu Prezidensiál Bairru-Pité Dili, tersa ne’e.
Durante sorumutu, Parlamentu Foinsa’e ba periódu dahaat aprezenta rezultadu hosi sesaun plenária daruak ne’ebé realiza ona iha fulan-dezembru tinan 2022 iha munisípiu Baucau hodi prodúz asuntu 5 importante ne’ebé hatúr iha polítika nasionál juventude hanesan juventude edukasaun sívika, juventude krime no violénsia, empregu no mós moris saudável.
“Rekomendasaun hirak ne’e iha balun ne’ebé ministériu relevante halo ona, maibé seidauk kobre hotu hanesan eskola nian, seidauk kontempla hotu ba eskola hotu-hotu ne’ebé ami identifika haree liliu ba estudante sira nian partisipasaun iha prosesu aprendijazen,” Nia dehan.
Hosi rezultadu peskiza balun nota estudante sira labele aprende ho di’ak tanba fatór infraestrutura nian, no mós menus professór, professor sira hanorin la tuir sira-nia área espesialidade nune’e impaktu tebes ba estudante sira atu aprende ho di’ak.
Nune’e mós iha programa merenda eskolár mezmu polítika husi Ministéiru Edukasaun Juventude no Desportu (MEJD) hatuur ona atu fó hahán ho nutrisaun di’ak ba estudante sira maibé realidade iha implementasaun la sinkroniza ho polítika MEJD.
“Entaun liu husi rekomendasaun sira ne’e hotu nafatin alerta ba MEJD atu bele halo monitorizasaun ba implementasaun programa merenda eskolár ne’e rasik,” nia hateten.
Iha área saúde nian sei mosu nafatin lamentasaun hosi komunidade sira tanba la satisfas ho atendementu ne’ebé maka pesoál saúde sira fó bainhira komunidade sira bá halo tratamentu saúde iha sentru saúde, postu saúde no ospitál sira.
Nune’e mós problema falta ekipamentu saúde ne’ebé la adekuadu hodi suporta pesoál saúde bainhira hala’o sira-nia kna’ar iha terrenu.
Entertantu, durante enkontru ne’e, hosi parte APFTL entrega mós dokumentu ne’e ba Xefe Estadu José Ramos Horta.
Jornalista: Nelson de Sousa
Editór: Agapito dos Santos
