OÉ-CUSSE 21 marsu 2023 (TATOLI) – Tribunál Rejiaun Administrativa Espesiál Oé-Cusse Ambeno (RAEOA), liuhosi Juiza Judisiál Primeira Instánsia, Florência Freitas, fo paresér ba empreza internasionál SAMHEE Contruction Ltd, hodi submete karta pedidu autorizasaun hosi tribunál atu kontinua halo manutensaun ba ekipamentu sira-ne’ebé paradu kuazu fulan-neen ona iha konstrusaun futuru edifísiu administrasaun Oé-Cusse.
Juiza Judisiál Primeira Instánsia, Florência Freitas, fo parresér liuhosi karta despaxu ho númeru prosesu 0025/22.CVTDO prazu loron 10 ba empreza internasionál SAMHEE Contruction Ltd, hodi submete karta pedidu autorizasaun hosi tribunál atu kontinua halo manutensaun ba ekipamentu sira-ne’ebé paradu kuaze fulan-neen ona iha konstrusaun futuru edifísiu administrasaun Oé-Cusse, hanesan karreta no mákina bele hamanas hamoris kada semana dala rua.
Dokumentu ofisiál ne’ebé Agência Tatoli asesu iha Tribunál Oé-Cusse, propoin, objetivu hosi despaxu autorizasaun ba manutensaun ekipamentu sira ne’e, importante atu evita estragu no produsaun ba ekipamentu.
Alende ne’e mós, iha segunda ne’e (20/03), Tribunál Rejiaun Oé-Cusse, lidera hosi Juiza Judisiál Primeira Instánsia, Florência Freitas, Ministériu Públiku, reprezenta hosi Procuradór Jerál Matias Soares hamutuk ho mandatóriu empreza SAMHEE akompaña hosi advogadu privadu, João Ndun hala’o identifikasaun no observa áreador ba ekipamentu sira-ne’e, iha futuru bele koloka segurAnsa hosi PNTL hodi asegura, atu labele hetan estragu hosi ema deskoñesidu.
Hafoin identifikasaun, Advogadu João Ndun, informa, antes ne’e mandatóriu mak husu autorizasaun hosi tribunál maibé hafoin hala’o manutensaun, ekipamentu balu la funsiona tanba paradu kleur afeta ekipamentu sira-ne’e.
Nia promete, sei kumpri despaxu trbunál nian, iha loron 10 nia laran sei submete hikas pedidu daruak, husu autorizasaun atu kontinua halo manutensaun ba faze daruak nian.
“Ohin ami hamutuk ho Tribunál, Ministériu Públiku no mandatáriu hosi empreza SAMHHE, mai identifika ekipamentu sira, tanba ami hatama pedidu iha tribunál Distritál Díli atu halo manutensaun ba ekipamentu pezadu sira-ne’e, tanba iha outubru 2022 halo ona área Estadu ona ba ekipamentu barak, maibé ita haree tempu sei naruk entaun ekipamentu sira importante ba kontinuasaun obra ne’e,” nia katak.
Maibé labele halo tanba bateria hosi ekipamentu avaria no la funsiona ho di’ak, nune’e ohin ekipa konjunta mai haree, no hosi parte mandatóriu sei hato’o fila-fali pedidu ida ba tribunál atu autoriza halo matensaun ba faze daruak nian.
Entretantu, iha 2022 empreza internasionál SAMHEE Constructions Ltd, hetan kondenasaun hosi Ministériu Públiku kona-bá konstrusaun futuru administrasaun RAEOA paradu, ne’ebé konsidera kontra kódigu prosesu sivíl prevista artigu 349 kódigu penál Timor-Leste nian.
Purtantu, edifísiu administrasaun ne’e konstrui hosi Empreza Internasionál SAMHEE Construction Ltd, iha bairru Santa Rosa, aldeia Oésono, sub-rejiaun Pante Makasar ho valór orsamentu millaun $10,900,033.37, Autoridade RAEOA aloka hosi orsamentu Jerál Estadu (OJE) 2016 nian ho dursaun servisu fulan 18, konstrusaun ne’e hahú ezekuta iha loron 01 fevereiru 2017 no termina iha 2018.
Notísia relevante: Autoridade sei reanunsia konkursu públiku ba konstrusaun edifísiu administrasaun RAEOA
Jornalista: Abílio Elo Nini
Editór: Evaristo Soares Martins
