KM aprova tabela ba eskalaun sira ba pesoa koletiva públika no servisu personalizadu
DILI, 22 marsu 2023 (TATOLI) – Konsellu Minisrtu (KM) aprova ona projetu rezolusaun Governu nian ne’ebé determina ba tinan 2023, kona-ba tabela eskalaun sira ba pesoa koletiva públika no servisu personalizadu.
“Aprova rezolusaun Governu kona-ba tabela eskalaun sira ba pesoa koletiva públika no servisu personalizadu ne’ebé abranje hosi Dekretu-Lei n.u 92/2022, loron 22 fulan-dezembru, ba efeitu determinasaun remunerasaun ba sira-nia titulár órgaun sira”, Fidélis Magalhães hatete iha Palásiu Governu.
Nia dehan, tuir dekretu lei númeru 92/2022 ne’ebé aprova ona kona-ba provimentu no remunerasaun ba titulár órgaun hosi pesoa koletiva sira ne’ebé integra an iha administrasaun indireta Estadu, Konsellu Ministru aprova ona tabela kona-ba eskalaun pesoa koletiva públika no servisu personalizadu sira ba tinan ne’e.
Tuir dekretu lei refere prevee kona-ba remunerasaun ba titulár órgaun diresaun ba pesoa koletiva sira mak ho despeza média ne’ebé hanesan ka aas-liu hosi millaun $10 maka valór ne’ebé korrespondente ba 90% hosi remunerasaun Primeiru-Ministru nian.
Nune’e, ho despeza média ne’ebé hanesan ka aas liu hosi millaun $5 maka valór ne’ebé korrespondente ba 80% hosi remunerasaun Xefe Ezekutivu nian.
“Ho despeza média ne’ebé hanesan ka aas-liu hosi millaun $1 maka valór ne’ebé korrespondente ba 70% hosi remunerasaun Primeiru-Ministru nian no despeza média ne’ebé menus liu hosi millaun $1 maka valór ne’ebé korrespondente ba 60% hosi remunerasaun Primeiru-Ministru nian”, nia afirma.
Jornalista: Arminda Fonseca
Editora: Maria Auxiliadora
