DILI, 22 marsu 2023 (TATOLI) – Governu nomeia Merita Antónia Armindo Monteiro, hodi ezerse kargu hanesan Prezidente Konsellu Diretivu Institutu Nasionál Saúde Públika Timor-Leste (INSP-TL).
Dezignasaun ne’e Ezekutivu halo liuhosi aprovasaun ba projetu Rezolusaun Governu, ne’ebé aprezenta husi Ministra Saúde (MS), Odete Belo.
“Tuir rejime komisaun servisu ho durasaun tinan haat”, Ministru Prezidénsia Konsellu Ministru, Fidélis Magalhães informa iha Palásiu Governu.
Biban hanesan, nomeia mós Lourenço Camnahas no Ismael Salvador da Costa Barreto, hodi ezerse kargu hanesan vogál sira ba Konsellu Diretivu INSP-TL nian, tuir rejime kontratasaun tempu parsiál, ho durasaun tinan haat.
INSP-TL hanesan institutu ne’ebé mak tau hamutuk servisu monitoriza, avalia no análize estadu jerál saúde iha institutu úniku, nune’e bele kolabora iha vijilánsia epidemiolójika no sanitária, investigasaun sientífika, kontrolu risku no ameasa ba saúde públika, dezenvolvimentu no formasaun rekursu umanu, peskiza no inkorporasaun teknolójika iha saúde públika, inklui kontrolu kualidade iha área saúde ne’ebé determina ona.
Atribuisaun servisu sira mai ho kooperasaun ho institutu sira iha país sira seluk, nune’e bele kria organizasaun ida ho baze sientífika ne’ebé forte, fó lideransa no esperiénsia ba esforsu iha nível nasionál atu alkansa melloria substansiál iha tempu naruk ba saúde públika inklui afirma-an nu’udár fonte viável ba akonsellamentu hodi formula no foti desizaun hosi responsavel polítiku sira.
Jornalista: Antónia Gusmão
Editora: Maria Auxiliadora
