OÉ-CUSSE 22 marsu 2023 (TATOLI) – Diretór Rejionál Agrikultura, Rejiaun Administrativa Espesiál Oé-Cusse Ambneo (RAEOA), Cirilío dos Remedios Baba, informa, atakasaun hosi peste ba plantasaun produtu alimentasaun hahú menus.
Tuir nia, menus tanba kooperasaun tékniku estensionista suku ho agrikultór sira iha baze, kontinua akompaña no buka maneira oinsá salva alimentasaun hosi atakasaun peste.
“Plantasaun liuliu produtu alimentár sira, iha tinan ne’e ba problema peste ataka ba ai-haan sira menus tanba ita laiha informasaun ka keixa ruma mai hosi autoridade lokál no mós relatóriu mai hosi tékniku estensionista sira iha suku, to’o laiha relatóriu ida kona-bá peste ataka ai-haan iha komunidade nia to’os,” Cirilío dos Remedios Baba, hatete, iha Oé-Cusse, kuarta ne’e.
Nia informa, iha Oé-Cusse suku 18 estensionista kolokadu ona, ho objetivu atu akompaña no serbisu hamutuk ho agrikultór sira iha suku idak-idak, só suku Costa tanba área luan, diresaun agrikultura destaka tékniku na’in-rua.
Diretór Agrikultura ne’e, relembra, iha tinan hirak kotuk, Oé-Cusse akontese peste ataka plantasaun sira iha to’os agrikultór sira, hanesan gafañotu, maibé depois liuhosi koordenasaun serbisu hamutuk ho tékniku konsege salva no halakon.
“To’o agora peste ataka ladún, tanba tékniku ho to’os na’in-sira koopera kria maneira, tanba antes ne’e komunidade balu uza erbisida, atu hamate du’ut antes kuda no depois kuda, entaun ida-ne’e konsege hamate mikróbiu balu, ne’ebé bele sai mós predatór ka salva guarda ba plantasaun, tanba mikróbiu balu la’ós sai peste maibé balu sai salva guarda, tán ne’e maka durante ne’e agrikultór sira uza erbisida sai mós problema,” nia katak.
Entaun durante ne’e, parte diresaun prefere liu ba utilizasaun pestisida, tanba erbisida uza rega rai mamuk, maibé pestisida uza hodi rega peste ne’ebé ataka plantasaun alimentár.
“Tán ne’e nia rezultadu, peste ataka menús, relatóriu hosi esténsionista suku submete mai iha diresaun seidauk rejista suku ida, kona-bá peste ataka alimentár sira,” nia tenik.
Entretantu, totál tékniku estensionista iha Oé-Cusse hamutuk na’in-23 komposta hosi tékniku suku na’in-19 no koordenadór sub-rejiaun na’in-haat.
Notísia relevante: Estensionista 26 iha RAEOA tuir formasaun téknika metodolojia agríkola
Jornalista : Abílio Elo Nini
Editór : Evaristo Soares Martins
