NASIONÁL, EDUKASAUN, HEADLINE, POLÍTIKA

Planu Asaun Nasionál ba Juventude aprovadu iha Konsellu Ministru

Planu Asaun Nasionál ba Juventude aprovadu iha Konsellu Ministru

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (22/03). Imajen Tatoli/Francisco Sony

DILI, 22 marsu 2023 (TATOLI) – Konsellu Ministru aprova projetu rezolusaun Governu, ne’ebé aprezenta husi Ministru Edukasaun Juventude no Desportu (MEJD), Armindo Maia, no husi Sekretáriu Estadu Juventude no Desportu (SEJD), Abrão Saldanha, kona-ba Planu Asaun Nasionál ba Juventude no Abordajen Integrada Dezenvolvimentu Juventude.

Ministru Prezidénsia Konsellu Ministru, Fidélis Magalhães, informa rezolusaun Governu ida-ne’e ninia objetivu importante mak atu lansa baze ba forma foun ida ba Ezekutivu atu halo lei iha área Juventude, ho intensaun atu promove kriasaun ba norma sira ne’ebé sei fó benefísiu ba joven sira-nia dezenvolvimentu, iha ne’ebé futuru Timor-Leste nian depozita iha juventude sira país ne’e nian.

“Ho rezolusaun ida-ne’e, Governu afirma filafali ninia kompromisu, vontade no determinasaun ba dezenvolvimentu juventude no implementasaun ba Polítika Nasionál Juventude nian, nune’e mós atu halo aprovasaun Planu Asaun Juventude 2023 to’o 2027 no ba definisaun markadór juventude no mekanizmu ba abordajen ne’ebé integra ba dezenvolvimentu juventude ne’ebé define iha planu nasionál husi sesaun interministeriál oioin”, Fidélis Magalhães hatete iha Palásiu Governu.

Nia realsa lejizlasaun hothotu ne’ebé Governu prodús tenke sai alvu ba análiza ida ne’ebé klean ne’ebé sei haree liu ba ninia impaktu sira ba joven sira, pozitividade ka negatividade husi impaktu ne’e no kompatibilidade hosi norma sira ne’ebé iha hela análize ho Polítika Nasionál Juventude, nune’e mós lejizlasaun sira seluk ne’ebé importa direitu no obrigasaun ba joven sira.

“Entidade sira ho natureza privada, titulár ka la’ós titulár estatutu interese públiku nian, insentiva mós sira hodi adota iha sira-nia negósiu no atividade sira, kualkér ninia natureza, medida avaliasaun interna ba impaktu iha juventude, ne’ebé enkoraja, hodi duni sira-nia objetivu no ezersísiu ba sira-nia atividade, nune’e mós sira konsidera pontu prinsipal tebes ne’ebé Polítika Nasionál Juventude define ona”, nia salienta.

Planu Asaun Nasionál Juventude ne’e rejista iha área prinsipál lima hanesan, edukasaun, moris saudavel, empregu, partisipasaun sívika no violénsia sira-ne’e hanesan proposta intervensaun konjuntu ida ne’ebé sei implementa husi liña ministeriál oioin.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!