iklan

INTERNASIONÁL, EDUKASAUN, BOBONARO, HEADLINE, MUNISÍPIU

WFP apoia Governu TL mellora programa merenda eskolár ba eskola 400

WFP apoia Governu TL mellora programa merenda eskolár ba eskola 400

Governu ho parseiru Programa Ai-han Mundiál (WFP), Ajénsia Kooperasaun Internasionál Korea (KOICA) ho autoridade Munisípiu Bobonaro inklui profesór eskola sira, hasai foto hamutuk hafoin entrega Untensilus Dapur, iha eskola Ensinu Bazíku Sentrál (EBC) númeru II Maliana. ImaJen Tatoli/Sérgio da Cruz.

BOBONARO, 22 marsu 2023 (TATOLI)- Organizasaun Nasaun Unida liuhosi Programa Ai-haan Mundiál (WFP, sigla inglés) kontinua apoia Governu Timor-Leste (TL) hodi mellora programa merenda eskolár ba eskola hamutuk 400 iha territóriu nasionál.

Programa ne’e apoia orsamentu hosi Ajénsia Kooperasaun Internasionál Korea (KOICA) hamutuk millaun $7.8 liuhosi Governu Koreia hahú hosi tinan 2021 to’o 2025 hodi implementa projetu ‘Say No ho 5S’ hateten lae ba hamlaha, lumbriga, infesaun kulit, fuma, bebida midar/alkóliku sira.

Projetu konjunta hamutuk 400 ne’e iha Munisípiu Bobonaro, Manufahi, no Baucau sei hetan benefísiu hosi Merenda eskolár ne’ebé saudável no nutritivu, ai-haan fortifikadu, ambiente te’in no dapur eskola ne’ebé di’ak liuhosi programa refere.

Hanesan parte hosi programa saúde eskolár no programa nutrisaun hosi projetu ‘hateten lae ba 5S’.

 Notísia relevante: Governu-WFP entrega untensilus dapur 13 ba EBC iha Maliana 

“Ami sei harii dapur eskola iha modelu eskola 10 no sei fornese ekipamentu ba dapur eskola hamutuk 400 faze tuir mai iha munisípiu tolu” Reprezentante WFP iha Timor-Leste, Cecília Gerzon, liuhosi komunikadu imprensa ne’ebé Agência Tatoli asesu, kuarta ne’e.

Enkuantu iha (22/04) tinan ne’e WFP ho apoiu hosi KOICA entrega ekipamentu dapur ba eskola hamutuk 80 iha faze dahuluk ba governu Timor-Leste hodi melora ambiente te’in no promove ai-haAn nutritivu ne’ebé seguru ba iha eskola.

“Ami orgullu hodi fó apoiu ba Ministériu Edukasaun, Juventude no Desportu atu implementa programa merenda eskolár no hadia’a labarik estudante sira-nia saúde iha Timor-Leste, WFP ho apoiu hosi KOICA entrega ekipamentu dapur hamutuk 400 iha rai laran hodi kontribui ba nutrisaun ne’ebé di’ak liután liuhosi foos fortifikadu no hadi’a saúde liuhosi komunikasaun mudansa hahalok no sosiál (SBCC),” nia katak.

Programa ne’e mós hanesan pasu boot ida hodi kombate dezafiu boot rua hanesan inseguransa ai-haan no má-nutrisaun ba labarik sira iha eskola.

Alende responde infrastrutura dapur eskolár hodi hadi’a programa merenda eskolár, WFP mós apoia no haforsa sistema jestaun kadeia de valór, hadi’a sistema monitorizasaun no avaliasaun no introduz foos fortifikadu iha programa ne’e, no sensibilita saudavél liuhosi komunikasaun mudansa hahalok ba estudante iha eskola.

“Ami espera katak, parseria ida-ne’e sei kontinua hodi fó apoiu ba labarik estudante sira-nia nutrisaun di’ak no seguransa ai-haan hodi atinje sira-nia mehi,” Cecília Gerzon dehan

Notísia relevante: Governu aloka miliaun $15 ba merenda eskolár iha 2023

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!