ANPM seidauk simu relatóriu hosi Timor Resources kona-ba rezultadu fura mina iha Suai
COVALIMA, 23 marsu 2023 ( TATOLI)– Prezidente Autoridade Nasionál Petróleu no Minerál (ANPM), Florentino Saores Ferreira, informa seiduak simu notifikasaun husi kompaña Timor Resources (TR), ne’ebé durante hala’o perfurasaun mina iha rai-maran liuliu rezultadu amostra valór mina komersiál no durasaun atu halo produsaun.
“Ami seidauk simu notifikasaun husi kompaña Timor-Resources. Tanba normalmente indústria ne’e iha kontratu bainhira deskobre mina ho kuantidade komersiál ne’e, kompaña hateten mai ami durante oras 24, bazeia ba kontratu to’o ohin- loron ami seidauk simu notifikasaun formal”, Prezidente ANPM, Florentino Soares Ferreira , informa ba Agência TATOLI iha Aeroporto Komandante em Chefe Kay Rala Xanana Gusmão , kinta ne’e.
Nune’e, Responsavél ANPM ne’e afirma kontinua hein notifikasaun husi kompaña Timor Resources, hafoin bele deklara ofisiál ba públika kona-ba rezultadu teste amostra kuantidade komerisál hira no iha deskoberta ruma.
“Ita presiza halo deskoberta tékniku komersiál no presiza mós hala’o teste, nune’e bele hatene kuantidade no sei halo pefurasaun atu halo teste”, nia afirma.
Tanba Timor-Leste foin dahuluk halo perfurasuan mina iha rai-maran hafoin tinan-50, laiha perfurasaun, nune’e kompaña rasik sei iha prosesu atu hatene di’ak liu sira-nia progresu servisu.
Nia dehan molok kompaña atu to’o konkluzasaun finál mina ne’e iha ho kuantidade hanesan ne’e, tanba Timor-Leste foin hahú halo perfurasaun iha rai-maran, la’ós fasil tanba kompaña mós iha difikuldade balun, nune’e hein sira bele rezolve sira bele kontinua sira-nia programa.
“Kompañia halo teste amostra hanesan teste integradu no labele dehan mina iha, maibé tenke iha aparellu halo teste balun no halo mós perfurasaun well teste atu haree kuantidade. Hafoin kuantidade komersiál husi rai okos sei introdus fatór rekoperasaun porsentu hira hanesan barril 10.000 ka 30% entaun bele foti barril 3.000”, nia afirma.
Antes ne’e, Jerente Timor Resources, Filimino Andrade hateten tuir alvu kompañia Timor Resources fura to’o metru 3.000, maibé bazeia ba rekomendasaun husi jeolójia to’o metru 3.500 , nune’e daudaun to’o metru 3100,ida-ne’e depende bainhira karik hatun tan perfurasaun.
Entertantu, iha loron 27 outubru 2021, Primeiru Ministru Taur Matan Ruak , ofisiálmente lansa perfurasaun dahuluk ba kontratu fahe produsaun iha posu feto Kma’us iha munisípiu Covalima ne’ebé hanesan perfurasaun dahuluk iha rai maran hafoin tinan 50 Timor-Leste hetan nia independénsia iha tinan 2002.
Jornalista: Celestina Teles
Editór : Florencio Miranda Ximenes
