iklan

EKONOMIA

EDTL,E.P realiza pre-bid meeting ho kompañia-sira ba konkursu projetu Solar PV

EDTL,E.P realiza pre-bid meeting ho kompañia-sira ba konkursu projetu Solar PV

Prezidente Konsellu Administrasaun Eletrisidade Timor-Leste (EDTL E.P.), Paulo da Silva. Imajen Tatoli /Egas Cristovão

DILI, 23 marsu 2023 (TATOLI)—Eletrisidade de Timor-Leste, Empreza Públika (EDTL,E.P) kinta ne’e, halo pre-bid meeting (reunião pré-oferta, sigla portugues) ho kompañia sira ne’ebé sosa ona dokumentu konkursu internasionál kona-ba projetu Solar Photovoltaics (PV) ne’ebé halo ona ninia lansamentu iha 27 fevereiru 2023 iha postu administrativu Laleia, munisípiu Manatuto.

“Ohin ita halo pre-bid meeting ba kompañia sira ne’ebé sosa ona dokumentu kona-ba projetu solar PV.  Ita esplika kona-ba prosesu dokumentu konkursu internasionál nian no rekezitu sira hanesan, tékniku finansa nian ba sira tanba horiseik kompañia 40 resin ba vizita ona projetu plantaSolar PV iha Manatuto,” Prezidente Konsellu Administrasaun Eletrisidade Timor-Leste (EDTL E.P.), Paulo da Silva hateten ba jornalista iha salaun, EDTL,E.P Caicoli, Dili.

Nia dehan, kompañia ne’ebé daudaun sosa ona dokumentu konkursu internasionál ba projetu Solar PV, ne’e hamutuk 70 resin. Hosi kompañia sira ne’e hahú hosi internasional no nasional no horiseik sira rasik ba vizita ona fatin ba projetu ne’e iha Manatuto.

“Objetivu horiseik ita ba vizita sítiu projetu planta Solar  PV ne’e atu haree no observa direta área konstrusaun sub-stasaun no instalasaun Solar PV. Nune’e kompaña hirak ne’e iha idea kona-ba konstrusaun sivil,” nia dehan.

Nia afirma, pre-bid meeting ne’ebé ohin EDTL,E.P halo ho kompaña sira ne’e hodi diskute hamutuk preokupasaun no dúvida balu liga ho servisu tékniku nian. Nune’e kompaña hirak ne’e prepara dokumentu hodi halo submisaun durante loron 40 nia-laran.

Tuir planu EDTL, E.P sei finaliza prosesu tomak no iha inísiu fulan setembru tinan ne’e, sei anúnsiu manan-nain ba projetu konstrusaun sub-stasaun no instalasaun Solar PV. Nune’e EDTL, E.P sei selebra kontratu ho kompaña manan-nain, hafoin ne’e submete ba tribunál hodi fiskaliza kontratu no akordu refere hodi hetan vistu ba implementasaun projetu.

“Kona-ba orsamentu Estadu no EDTL,E.P la tau osan, ida ne’e ita bolu modalidade Independent Power Producer (IPP). Signifika setór privadu sira mak sei investe sira-nia osan, halo konstrusaun no manutensaun mak faan mai EDTL,E.P sosa,” Paulo hateten.

Nia dehan, objetivu Governu hakarak investe projetu Solar PV  ne’e tanba opsaun hosi solar PV ne’e sei ajuda Timor-Leste halo poupansa ba despeza sosa gazoel ba jeradór sira iha Hera no Betano.

“Ita hotu hatene kada tinan Estadu hasai osan sosa gazoel ense ba jeradór sira ne’e mínimu liu milliaun $126. Entaun ita hahú ona halo tranzisaun  hosi fossil fuel ba iha enerjia renovável,” nia hateten.

Kompañia internasionál ne’ebé daudaun sosa ona dokumentu konkursu internasional mai hosi, Fransa, Xina, Indonézia, Austrália no seluk tan. 

Jornalista : Arminda Fonseca

Editora     : Armandina Moniz

iklan
iklan

Leave a Reply

iklan
error: Content is protected !!