DILI, 23 marsu 2023 (TATOLI) – Governu Xina entrega mákina Laparoscópica ida ba Hospitál Nasional Guido Valadares (HNGV) hodi fó operasaun ba pasiente sira ne’ebé mak problema ho fatuk iha aten, apoiu ida ne’e bele redúz transferénsia ba rai liur.
Enkarregadu Negósiu Embaixada Xina iha Timor-Leste, Xu Danyang, hateten reprezenta Governu Xina ohin fó doasaun mákina Laparoscópica médiku nian ne’ebé presiza urjente ba Ministériu Saúde Timor-Leste nian atu uza hodi bele halo operasaun ba pasiente ho problema fatuk iha aten.
Nia rekorda, Xina apoiu formalmente kona-ba dezenvolvimentu servisu médiku no saúde iha Timor-Leste. Kada tinan fó doasaun aimoruk no ekipamentu 20.
Iha inísiu 2004, Xina haruka ekipa médiku ba Timor-Leste. Nasaun rua ne’e servisu hamutuk durante tinan 19 nia-laran, ekipa médiku Xineza fó tratamentu ba timoroan sira liu rihun atus tolu (300.000).
Iha fatin hanesan, Diretór Ezekutivu HNGV, Alito Soares agradese ba Governu Xina ne’ebé apoiu tan mákina laparoscópica hodi halo operasaun ba pasiente sira ne’ebé ho problema fatuk iha aten.
“Ekipamentu ne’ebé mak oferese ne’e mak mákina laparoscópica, hanesan aparelu ida ne’ebé iha sirurjia nian, hodi utiliza atu halo operasaun ba fatuk iha ema nia aten, entaun ida-ne’e fó vantajen ne’ebé mak di’ak ba departamentu sirurjia nia”, Alito Soares afirma.
Diretora Jerál Servisu Prestasaun Saúde iha Ministériu Saúde Odete Viegas, subliña Governu liuhosi MS, tau preoridade ba saúde, liuliu ba povu no komunidade liuhusi kuidadu saúde primária, sekundáriu no tersiáriu nian.
“Ita hatene katak ita mesak labele servisu, tanba ne’e mak ita halo koperasaun bilaterál ho Brigada Xina no Brigada Cuba, ita hahú kedas iha 2004, ita-nia koperasaun to’o mai agora ho di’ak tebes, entaun ho apoiu ne’ebé iha daudaun ne’e ita bele kuidadu atu ita uza to’o tempu naruk hodi fó tratamentu ba ita-nia pasiente sira”, Odete da Silva konklui.
Jornalista : Felicidade Ximenes
Editór : Zezito Silva
