IGT-RAEOA laiha karreta operasaun no menus rekursu umanu
OÉ-CUSSE 23 marsu 2023 (TATOLI) – Inspesaun Jerál Traballu (IGT, sigla portugés), iha Sekretaria Estadu Formasaun Profisionál no Empregu (SEFOPE), Rejiaun Administrativa Espesiál Oé-Cusse Ambeno (RAEOA), ladún halo inspesaun to’o baze tanba laiha karreta operasaun no menus rekursu umanu.
Pontu fokál Inspesaun Jerál Traballu, Domingos Falo, informa, daudaun ne’e susar tebes atu hala’o inspesaun ba empregadór sira iha sub-rejiaun no nível suku tanba situasaun udan difikulta tebes transporte motorizada atu asesu ho seguru.
“Ita ko’alia kona-bá disputa laborál ne’e dalaruma ema maka hodi keixa mai, dalaruma ami hetan informasaun, ami tenke tenke tún ba terrenu maske iha sub-rejiaun ka nível suku, ami tenke bá, liuliu serbisu inspesaun traballu nian, ne’e difikulta tebes ami, tanba menus rekursu umanu no transporte,” nia ko’alia iha Oé-Cusse, kinta ne’e.
Tuir nia, bainhira hala’o inspesaun iha zona Pante Makasar bele asesu ho di’ak, bele uza motorizada maibé kuandu dezloka ba sub-rejiaun sira, situasaun udan kondisaun estrada difikulta tebes, ekipa inspesaun atu to’o baze tanba uza de’it motorizada.
“Ida-ne’e ba futuru presiza tau atensaun, liuliu transporte tanba atu ba Pássabe, Oésilo no Nítibe, ita tenke presiza transporte karreta, tanba emprezáriu barak mós agora konsege hala’o ona atividade komérsiál iha baze, entaun presiza hetan kontrolu hosi ekipa inspesaun,” nia katak.
Daudaun ne’e hala’o serbisu iha Inspesaun Jerál Traballu ema na’in-ida, mediadór na’in-ida, no inspesaun traballu estajiáriu na’in-ida, ho totál hamutuk ema na’in-lima maka hala’o serbisu inspesaun ba loborál iha Oé-Cusse.
“Maibé ida-ne’e la’ós sai problema, ne’e ami-nia kna’ar, foin daudaun ne’e ami konsege asesu to’o nível sub-rejiaun sira, no rejista emprezáriu hala’o atividade komérsiál hamutuk 90, ida-ne’e balu seidauk iha edifísiu, iha futuru ami sei esforsa atu kontinua to’o baze,” nia katak.
Jornalista : Abílio Elo Nini
Editór : Evaristo Soares Martins
