OMS komprometidu haforsa servisu atendimentu iha TL
DILI, 23 marsu 2023 (TATOLI) – Organizasaun Mundiál Saúde (OMS) kompromete nafatin hodi servisu hamutuk ho Ministériu Saúde atu haforsa servisu atendimentu ba povu iha Timor Leste.
“Ami nafatin apoiu Ministériu Saúde atu haforsa nafatin servisu atendimentu iha Timor-Leste liuhosi apoiu ekipamentu ospitalar sira”, Reprezentante Organizasaun Mundiál Saúde Arvind Mathur, informa ba TATOLI iha nia kna’ar fatin Caicoli.
Nia dehan, OMS hanesan parseiru tékniku ba Minsitériu Saúde hodi haree liubá servisu saúde esensiál sira.
“Ami hanesan parseiru tékniku ida ne’ebé mak apoia ba MS liuliu haree ba servisu saúde esensiál hanesan ekipamentu médiku durante iha situasaun Covid-19, materiál prevensaun no kontrolu ba infesaun (IPC) ne’ebé apoia ba fasilidade saúde hotu iha Timor-Leste liuliu ba saúde primaria, sekundária no tersiaria nian”, nia informa.
Nia hateten, Timor-Leste iha saúde universál ho objetivu lori saúde ba ema hotu katak labele husik ema ida iha kotuk, entaun servisu saúde ne’ebé mak durante ne’e iha fó ba ema hotu atu prioritiza husi OMS iha Timor-Leste mak servisu saúde universál atu fornese servisu ida ne’ebé mak adekuadu ba ema hotu.
Ho ida ne’e, OMS nafatin haforsa sistema saúde liuhosi apoiu ekipamentu médiku inklui hasa’e kapasidade profisionál saúde atu atende ba kazu emerjénsia sira.
“Atu dezenvolve servisu saúde sira iha nivél fasilidade sira, ami apoiu ekipamentu médiku inklui hasa’e kapasidade pesoál saúde sira iha nivel ospitál referál, rejionál no nasionál”, nia afirma.
Nia rekorda, OMS mós durante ne’e apoiu iha saúde materna infantil, tuberkoloze no moras la hadaet sira bazea ba pakote servisu esensiál ne’ebé mak identifika iha postu saúde, sentru saúde, ospitál referál no ospitál nasionál sira.
Jornalista : Felicidade Ximenes
Editór : Zezito Silva
