Autoridade lokál husu MOP konstrui moru protesaun iha mota Uetuku
VIQUEQUE, 24 marsu 2023 (TATOLI)— Xefe suku Bibileo, Postu Administrativu Viqueque-Villa, munisípiu Viqueque, Maria Odete dos Anjos Amaral, husu ba Governu liuhosi Ministériu Obra Públiku (MOP) atu konstrui moru protesaun ba iha mota Uetuku tanba fó ameasa ba abitante sira husi suku Bibileo.
“Ha’u reprezenta komunidade sira-nia preokupasaun hakarak husu Governu tau netik moru protesaun ruma ba mota Uetuku nian tanba kada tinan sempre fó impaktu ba komunidade sira iha suku Bibileo”, Maria Odete dos Anjos Amaral, hateten ba Agência Tatoli, iha suku Bibileo, sesta ne’e.
Alende ne’e, Autoridade lokál ne’e husu mós ba MOP atu hadi’a mós dalan husi Karau Laek to’o iha tasi kuaze kilometru 2-resin tanba kondisaun aat, hafoin besik loos ona mota Uetuku entaun ida-ne’e mós presiza halo moru protesaun ruma.
Komunidade iha suku refere hakarak tau moru protesaun iha mota ninin, nune’e tempu udan boot mota halai tuir dalan tanba laiha moru protesaun bele afeta ba komunidade nia-uma.
“Kada tinan sempre akontese inundasaun entaun Governu mai apoiu ai-han emerjénsia ba ami kontente, maibé parte seluk ami sente triste tanba ami-nia ain sorin iha tasi no ain sorin iha rai maran. Ho ida ne’e maka ami hakarak hato’o ba parte kompetente hodi rezolve povu nian preokupasaun sira-ne’e. Atu povu la bele moris iha ameasa no risku nian laran, liuliu mota Uetuku nian”, nia rekomenda.
Tuir dadus abitante husu suku Bibileo iha aldeia ualu, komposta husi aldeia Hare-Oan ho totál uma-kain 117 ho totál populasaun na’in-537, Fato-Hossan uma-kain 72 ho abitante na’in-357, We-Bae totál uma-kain 88 ho abitante hamutuk na’in-400, Mane Klaran totál uma-kain 92 ho abitante na’in-182, Ai-Sahe totál uma-kain 73 ho abitante na’in-353.
Enkuantu, aldeia Amarleza totál uma-kain na’in-72 ho abitante na’in-334, Lacu-Uai totál uma-kain na’in-114 ho abitante na’in-524 no aldeia Balide-Oan totál uma-kain 77 ho totál abitante na’in-304, totál uma-kain 705 ho totál abitante 3.189.
Jornalista : Vitorino Lopes da Costa
Editór : Florencio Miranda Ximenes
