OÉ-CUSSE 24 marsu 2023 (TATOLI) – Ensinu Báziku Sentrál (EBC, sigla portugués) Nossa Senhora de Fátima, Padiae, suku Lalisuk, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), sesta ne’e, hala’o limpeza jerál iha igreja parókia São Miguel Arcanjo, Padiae nu’udar atividade kuarezma peniténsia molok tama Páskua.
Kuarezma nu’udar loron haatnulu ne’ebé hahú iha kuarta-feira sinza to’o domingu-páskua, tempu peniténsia ba sarani sira.
Tempu peniténsia ne’e mak hanoin hikas buat-ne’ebé ita sente liutiha halo sala ruma. Nune’e mós orasaun ka hahalok di’ak ruma ne’ebé ita halo atu hadook-aan hosi kulpa, ne’ebé baibain amlulik mak haruka bainhira ita bá konfesa.
“Agora ne’e tempu kuarezma, ami-nia eskola ne’e katólika, ne’e duni ami tenke hatudu ezemplu ba eskola sira-seluk atu sira mós bele partisipa iha tempu kuarezma, liuliu atividade iha igreja, kada tinan ami halo hanesan ne’e iha tempu kuarezma, ami mós partisipa atu prepara ita-nia aan tama ba festa Páskua,” Koordenadór EBC Nossa Senhora de Fátima Padiae, Hercolano Kofi, ko’alia iha Oé-Cusse.
Alende hala’o limpeza iha parókia, parte eskola mós sei simu retiru hosi igreja parókia São Miguel Arcanjo, Padiae, nu’udar ema kristaun molok tama festa Páskua.
“Agora ami simu ona konvite hosi parókia nian atu mai fó pembinaan ba estudante no profesór sira iha eskola, ne’ebé ajenda ne’e sei hala’o iha semana oin, loron tersa 28 marsu ne’e, inisiativa ne’e atu ita-bele hanorin alunu sira, atu nune’e sira mós partisipa iha tempu peniténsia ninian, liuliu iha igreja,” nia afirma.
Joana Carvarela Sequeira da Silva, nu’udar estudante hosi EBC Nossa Senhora de Fátima, Padiae, sente kontente hodi hala’o limpeza hanesan tempu peniténsia atu prepara simu semana santa iha festa Páskua ho seguru.
“Agora ne’e tempu peniténsia ita tenke halo atividade iha igreja, nune’e bainhira mai partisipa misa ita-nia ambiente igreja moos no seguru ba sarani sira hotu,” nia orgullu.
Entretantu, totál estudante iha EBC Nossa Senhora de Fátima, Padiae hamutuk 215, komposta hosi mane 119 no feto 96, ho totál profesór permanente na’in-hitu (7), kontratadu na’in-haat (4) volúntariu na’in-haat (4).
Notísia relevante: PNTL RAEOA realiza retiru ho pontu prinsipál tolu
Jornalista: Abílio Elo Nini
Editor: Evaristo Soares Martins
