DILI, 24 marsu 2023 (TATOLI) –Timoroan iha Reino Unido ne’ebé kaer Pasaporte Timór husu Governu Timor-Leste (TL) atu haruka ekipa konjunta hosi Ministériu Justisa (MJ) no Ministériu Administrasaun Estatál (MAE) atu ba iha Reino Unido hodi renova Pasaporte no Billete Identidade (BI) ne’ebé kadukadu ona no mós halo Sertidaun RDTL ba sidadaun Timoroan sira ne’e.
“Inan-aman ho oan sira preokupa tebes ho sira ninia dokumentu Timór ne’ebé kadukadu tiha ona. Labarik sira maioria estudante presiza dokumentu ne’ebé moris (Válidu) hodi bele halo sira ninia atividade akadémika. Sira husu tebes mai ami nu’udar responsável komunidade atu hato’o asuntu ne’e ba Governu Timor-Leste atu haruka urjentemente ekipa renovasaun Pasaporte Timór no BI Timor mai UK,” Prezidente ETAP (East Timorese Association Peterborough), Celso Oliveira hateten, liuhusi komunikadu ne’ebé diriji ba redasaun Tatoli, ohin.
Nia afirma, komunidade timoroan sira ne’ebé mak reside iha Peterborough prontu atu serbisu no kolabora hamutuk ho governu Timor-Leste hodi lori benefísiu públiku ba sidadaun timoroan iha Reino Unido.
“Ha’u fó agradese ua’in ba ekipa ne’ebé halo ona serbisu no hasoru-malu ho sidadaun Timoroan sira laos deit hosi Peterborough, maibé mós hosi sidadi seluk hanesan Milton Keynes, Oxford, Cambridge, Latimer, Thrapston, G. Yarmouth, etc. Durante iha Peterborough, ekipa mós hasoru-malu ho autoridade lokál Peterborough hodi troka informasaun ba malun”, Oliveira haktuir.
Maria Costa, Timoroan hela iha Milton Keynes hateten: “resenseamento no atualizasaun baze dadus eleitorál ne’e importanti tanba hanesan sidadaun Timoroan tenke partisipa mós iha festa demokrasia hodi tuir eleisaun iha Timor-Leste. Maibe, iha futuru, governu Timor-Leste tenki iha planu ne’ebé di’ak liu hodi kontinua support (apoia) sidadaun timoroan iha Reino Unido, liliu legaliza estatutu sidadaun atu hela, eskola no serbisu iha UK”.
Nia énfaze, “Embaixada Timor-Leste iha UK tenke iha ninia edifísiu rasik hodi fó suport ba sidadaun Timoroan iha UK”.
Entretantu, Ekipa Komisaun Nasionál ba Eleisaun (CNE,sigla portugés) STAE (Sekretariadu Tékniku Administrasaun Eleitorá) no Embaixada RDTL London konsege rejistu sidadaun besik atus rua durante prosesu resenseamentu no atualizasaun baze dadus eleitorál iha sidade Peterborough, Reino Unido, ne’ebé la’o di’ak hosi inísiu to’o remata. Timoroan rihun ida hela no serbisu iha sidade Peterborough no arredór sira.
Tatoli
