DILI, 24 marsu 2023 (TATOLI) – Ministru Transporte no Komunikasaun (MTK), José Agustinho da Silva, fó pose ba Feliciano da Costa Correia, hodi troka Lamartino de Oliveira, lidera Autoridade Portuária Timor-Leste (APORTIL) ba períodu 2023-2025.
Ministru Transporte afirma, durante ne’e MTK ho hanoin atu troka ema tantu iha pozisaun sira Institutu Públiku no Empreza Públika ne’ebé mak hamahan-aan iha MTK hanesan Administrasaun Aeroportu no Navegasaum Aérea Timor-Leste (ANATL), Autoridade Aviasaun Sivíl Timor-Leste (AACTL), APORTIL no Autoridade Nasionál Komunikasaun (ANC).
“Esperiénsia ne’ebé mak iha APORTIL, AACTL tau ida ladi’ak depois troka fali ninia ritmu to’o agora. Ba ida ne’e atu dehan ha’u laiha problema indíviduu ho imi, ha’u-nia interese maka kuandu iha konfiansa atribui, ida ne’ebé mak simu konfiansa ne’e tenke hala’o kna’ar ho responsabilidade no tuir regra. Ha’u-nia rekizitu ne’e simples katak tenke onestu, signifika leál ba iérarkia, kumpri orientasaun hosi superiór”, José Agustinho da Silva, hateten iha serimónia tomada pose ba Prezidente APORTIL iha salaun MTK, Caicoli, sesta ne’e.
Notícia relevante: https://tatoli.tl/2022/01/25/lamartino-de-oliveira-troka-flavio-cardoso-lidera-aportil-i-p/
Nia hatutan, molok nia fó orientasaun, halo tiha ona ezersísiu lubuk boot, katak konsulta ho tékniku no parte legál. Rezultadu konsulta ne’e maka sai nu’udar orientasaun ba prezidente no diretur-jerál para bele ezekuta.
“Rekizitu ida seluk mak tenke servisu ho profisionál, tuir regra, nune’e bele asegura integridade ba interese Estadu. APORTIL ninia papél importante tuir dekretu-lei katak Institutu Publiku ida ne’e operasionaliza portu sira iha territóriu, agresivu iha rekolla reseita ba kofre Estadu. Durante ne’e ita haree iha institutu ida ne’e iha problema barak”, nia realsa.
Ezekutivu ne’e husu emposadu atu kumpri onra ne’ebé mak hato’o liuhosi juramentu.
“Ita boot-nia trabalho de casa lubuk boot ida. Ha’u husu para bele solusiona asuntu pendente sira ne’ebé mak liga ba rekolla reseita ba kofre Estadu. Ezemplu, mak ita iha dívida ajénsia máritma ne’ebé mak daudaun iha hela hodi akumula hosi tempu sira liubá to’o agora ninia valór la’ós uitoan. Governu ho ninia administrasaun direta no la’ós direta. Ita bele fasilita ita-nia emprezáriu lokál sira maibé ho regra durante sira prienxe rekizitu administrativu, tékniku no legál, sira-nia direitu tomak bele hala’o atividade ekonómika, maibé iha parte sorin tenke kumpri devér ba kofre Estadu, ida ne’e mak problema”, nia dehan.
Prezidente emposadu kompromete sei serbisu bazeia de’it ba lei, no garante katak sei halo buat di’ak durante mandatu tanba ekipa ne’ebé servisu hamutuk mai hosi ekipa ida forte tebes.
“Ha’u garante katak ha’u sei halo buat di’ak durante mandatu tanba ekipa ne’ebé sei serbisu hamutuk forte tebes. Ha’u fiar tebes sira no ladúvida ho sira-nia kapasidade tanba tinan barak serbisu nanis iha APORTIL”, Feliciano da Costa otimista.
Nia kompromete mós katak durante mandatu mak hala’o knaar latuir lei no orden, prontu atu responsabiliza.
Rekorde katak, Prezidente APORTIL sesante Lamartino de Oliveira asume kargu, iha loron 25 janeiru 2022, bá periúdu 2022-2023, nune’e foin kompleta tinan ida-resin hala’o kna’ar.
Notísia relevante: Lamartino de Oliveira troka Flávio Cardoso lidera APORTIL, I.P
Jornalista : Antónia Gusmão
Editora: Maria Auxiliadora
