DILI, 24 marsu 2023 (TATOLI) –Governu Konstituisioná da-ualu liuhusi Ministériu Edukasaun, Juventude no Desportu (MEJD) iha ona Karteira Eskolár hamutuk 20.000 no oras ne’e daudaun hahú distribui ona ba eskola sira iha territóriu nasionál.
Tuir planu, distribuisaun Karteira Eskolár 20.000 ne’e sei tau prioridade mós ba eskola sira ne’ebé maka tama iha projetu komunitária no kapitál dezenvolvimentu.
Diretór Nasionál Patrimóniu Lojístika no Teknolojia (DNPLT), Pedro Pinto dos Reis, relata katak agora daudaun sira distribui ona Karteira Eskolár hamutuk 11.812 ba eskola sira iha territóriu nasionál atu apoiu estudante sira.
“Ha’u hakarak dehan lista kada eskola maka ha’u seidauk hetan maibé lista kada munisípiu ho ninia distribuisaun sira iha hotu ha’u-nia liman hosi nível ida-idak nian,” nia informa.
Tuir DNPLT, Karteira Eskolár hamutuk 11.812 ne’ebé distribui ona tuir eskola sira iha kada Munisípiu ho nível ida-idak nian ne’e maka hanesan Munisípiu Aileu eskola Ensinu Sekundáriu Jerál (ESG) hetan Karteira Eskolár par 60, Ensinu Báziku (EB) hetan Karteira Eskolár par 240, Edukasaun Pré-Eskolár (EPE) hetan karteira eskolár 80 pares totál Karteira Eskolár par 380.
Hosi fali Munisípiu Ainaro, distribuisaun Karteira Eskolár ba eskola ESG hamutuk par 420 Eskola Sekundáriu Tékniku Vokasionál (ESTV) par 120, EB par 480. Totál karteira eskolár 1.020. Munisípiu Ataúro ESG hetan par 100, eskola EB par 60. Totál par 160.
Iha Munisípiu Baucau, distribui ba eskola ESG hamutuk par 360, ESTV hamutuk par 60, EB hamutuk par 960. Totál 1.380. Munisípiu Bobonaro, eskola ESTV hetan distribuisaun Karteira Eskolár hamutuk par 510, eskola EB par 1.255 pares, no EPE par 80. Totál 1.845.
Mai fali Munisípiu Dili distribuisaun Karteira Eskolár ba eskola ESG hamutuk par 360, ESTV par 120, EB par 520. Totál 1.000. Ba fali Ermera, distribuisaun Karteira Eskolár ba ESG hamutuk par 70, ESTV hamutuk par 270, no EB hamutuk par 520. Totál par 860. Covalima hetan distribuisaun Karteira Eskolár foin mak ba de’it EB hamutuk 679.
Enkuantu, Munisípiu Lautem distribuisaun Karteira Eskolár ba eskola ESG hamutuk par 180, ESTV par 120, EB par 600 no EPE par 40. Totál par 940. Munisípiu Liquiça distribuisaun ba eskola ESG hamutuk par 150, no EB par 480. Totál par 630. Munisípiu Manufahi, distribuisaun Karteira Eskolár ba Eskola ESG hamutuk par 120, ESTV par 180, no EB par 800. Totál 1.100.
Munisípiu Manatuto, distribuisaun Karteira Eskolár ba ESG hamutuk par 120, ESTV par 240, EB par 520 no EPE par 80. Totál par 960. Ikus liu, Munisípiu Viqueque, distribuisaun Karteira Eskolár ba eskola ESG hamutuk par 420, ESTV par 60 no EB par 360. Totál par 840.
Entretantu, hosi prosesu distribuisaun Karteira Eskolár ne’ebé maka DNPLT distribui tuir nível eskolár ne’e iha Munisípiu Bobonaro nivel ESG seidauk hetan Karteira Eskolár, Covalima nível ESG, ESTV no EPE seidauk hetan Karteira Eskolár. Aileu sei falta ESTV mak seidauk, Ainaro, Baucau, Dili, Ermera, Manufahi no Viqueque sei falta EPE mak seidauk hetan Karteira Eskolár. Ataúro sei falta ESTV no EPE, inklui Liquiça sei falta ESTV.
Hosi métade Karteira Eskolár hamutuk 8.188 ne’e sei kontinua distribui tan iha semana oin atu nune’e eskola sira ne’ebé maka seidauk hetan meza kadeira bele asesu hotu hodi ajuda labarik sira iha prosesu ensinu aprendizajen nia laran.
Iha parte seluk, estabelesimentu Ensinu Báziku Sentrál (EBC, sigla portugés) Metinaro, sei menus Karteira Eskolár nune’e difikulta estudante na’in 666 hodi partisipa iha atividade letiva.
Diretór EBC Metinaro, Duarte Amaral informa katak antes ne’e Ministériu Edukasaun, Juventude no Desportu (MEJD) promete ona atu apoiu Karteira Eskolár hamutuk 500 ba eskola ne’e hodi fasilita estudante sira iha prosesu ensinu aprendizajen maibé to’o seidauk realiza.
“Ami iha sala-aula hamutuk sia (9) ne’ebé fahe ba sétimu anu iha sala tolu, oitavu anu sala tolu inklui nonu anu sala tolu maibé Karteira Eskolár maka limitadu tebes halo ami-nia estudante sira difisil atu simu matéria ho di’ak,” Diretór Duarte Amaral ba Agência Tatoli iha Edifísiu MEJD, Vila Verde, sesta ne’e.
Ezekutivu ne’e haklaken, bainhira MEJD responde ona Karteira Eskolár ba nia fiar katak ezame primeiru périodu ne’e bele realiza ho di’ak tanba estudante sira bele hetan ona Karteira Eskolár ida-idak hodi bele tuir ezame.
Tanba ne’e nia sujere, bainhira MEJD seidauk posível oferese uluk Karteira Eskolár hamutuk 500 ne’e pelumenus 300 atu fasilita estudante sira iha ezame nia laran alende hein kumpleta tan 200.
Jornalista : Tomé Amado
Editór : Rafael Ximenes de A. Belo
