Servisu Saúde Viqueque rejista pasiente sofre tuberkoluze 200
VIQUEQUE, 24 marsu 2023 (TATOLI)— Tuir dadus estatístika hahú hosi janeiru to’o marsu ne’e, Servisu Saúde Munisípiu Viqueque, konsege rejista pasiente sofre tuberkoluze na’in-200.
“Ami rejistu kazu moras tuberkoluze iha munisípiu Viqueque na’in-200. Husi númeru ne’e, ami halo hela tratamentu ba sira ka tuir programa durante fulan neen nian laran no kada loron sira tenke konsumu ai-moruk atu bele kura moras ne’e hosi pasiente sira”, Diretór Serbisu Saúde munisípiu Viqueque, Pedro da Silva Fereira, hateten ba Agência Tatoli, iha ninia kna’ar fatin, Boro-Matan, sesta ne’e.
Daudaun ne’e, nia dehan ekipa pesoál saúde sira sei kontinua halo screening ba komunidade sira iha suku 36 hodi deteta sedu no halo prevensaun no tratamentu ba pasiente sofre tuberkoluze.
“Ami nia-ekipa pesoál saúde desloka ona ba postu lima liuliu tama sai suku hodi kontinua buka tuir moras tuberkoluze. Ita atu elemina moras ne’e iha Viqueque ne’e, ami halo kompaña sira munisipál ida atu bele halo prevensaun no tratamentu ba moras refere”, katak nia.
Nia dehan, antes ne’e munisípiu Viqueque deklara ona katak iha 2024 hahú elemina ona moras tuberkoluze tanba ne’e servisu saúde esforsu tama sai suku halo screening ba komunidade sira.
Nune’e, nia husu komunidade sira labele tauk ko’alia sai moras tanba ko’alia sai atu halo prevensaun no tratamentu lais hodi labele fó risku ba vida.
“Ha’u husu ba komunidade munisípiu Viqueque tomak katak kuandu sente isin tuun, mear semana ida ka rua no i’is boot dalan di’ak ba konsulta hodi hetan tratamentu. Rezultadu ema ne’ebé moras tuberkoluze hetan tratamentu ne’e isin di’ak fali, tan ne’e ba komunidade sira labele tauk no labele subar ita bo’ot sira moras, maibé hakbesik an ba fasilidade saúde sira iha suku no postu hodi hetan tratamentu”, nia enkoraja.
Jornalista : Vitorino Lopes da Costa
Editór : Francisco Miranda Ximenes
