DILI, 25 marsu 2023 (TATOLI) – Federasaun Futeból Timor-Leste (FFTL) realiza reuniaun anuál ho asosiasaun futeból munisípiu sira hodi ko’alia kona-ba servisu ne’ebé durante ne’e halo ona.
Prezidente FFTL, Francisco Jerónimo hatete, objetivu hosi reuniaun ne’e atu hametin liña koordenasaun sira hotu iha nível munisípiu ba dezenvolvimentu futeból nian.
“Enkontru ida ohin atu halo koordenasaun ho asosiasaun Munisípiu sira hotu atu haree ba oin kona-ba orsamentu, relatóriu atividade sira no planu estratéjiku sira kada asosiasaun ba dezenvolvimentu futeból,” Prezidente FFTL ba Agência Tatoli iha salaun Xanana Sport Centre Dili, sábadu ne’e.
Nia esplika, planu estratéjiku FFTL nian ba oin mak oinsá atu dezenvolve iha jogadór juvenil sira ho idade 07-12.
“Ita-nia planu estratéjiku mak halai liu ba jogadór juvenil sira, entaun ita husu ba asosiasaun sira tenke implementa treinamentu ba juvenil sira ho di’ak,” nia dehan.
Iha okaziaun ne’e ko’alia mós kona-ba situasaun reál ne’ebé asosiasaun Munisípiu sira hasoru daudaun ne’e hanesan oinsá atu halo kapasitasaun ba rekursu umanu.
“Ko’alia mós kona-ba situasaun hirak ne’ebé agora sira asosiasaun hasoru hela ne’e, liu-liu ba formasaun ba árbitru, treinadór atu kapasita di’ak liu tan rekursu umanu iha munisípiu ida-idak,” nia esplika.
Iha fatin hanesan, Vise Prezidente Asosiasaun Futeból Manufahi (AFM), Alcino Soares, relata, reuniaun ne’e importante tebes atu bele ko’alia kona-ba progresu servisu sira durante ne’e iha.
“Importante tebes iha reuniaun ida ohin atu ami ko’alia kona-ba servisu saida mak ami halo ona no saida ma kami seidauk halo. Durante ne’e ami só implementa orientasaun saida mak FFTL fó ba ami kona-ba oinsá fó treinamentu ba jogadór juvenil-sira ida ne’e mak ami halo no buat hotu la’o hela,” Vise Prezidente ne’e hateten.
Nia hatutan, kona-ba rekursu hanesan árbitru no treinadór ba sira sufisiente hela maibé presiza halo refreska fila fali.
Asosiasaun hirak partisipa iha reunaiun ne’e mak, Dili Leste, Dili Oeste, Liquiça, Lautem, Viqueque, Manufahi, Ainaro, Aileu, Ermera, Covalima, Manatuto, Baucau, Bobonaro no RAEOA.
Jornalista :Hortencio Sanchez
Editór : Rafael Ximenes de A. Belo
