João Halle lori Ponta Leste manán Ultramar ho golu úniku

DILI, 25 marsu 2023 (TATOLI) – Ekipa primeira divizaun Liga Futeból Timor-Leste (LFTL) AS Ponta Leste susesu iha nia jornada hafoin manán adversáriu Atletico Ultramar/Coração FC ho golu úniku ne’ebé prodús hosi jogadór João Bosco Halle.

Jogu ba ekipa rua ne’e hanesan jogu kontinuasaun LFTL époka 2022-2023 ne’ebé realiza iha Estádiu Munisipál Dili sábadu lorokraik ne’e.

Hanesan baibain minutu primeiru jogu la’o ekipa rua lansa kedan kontra no atake ba malu tuir tékniku no abilidade ekipa ida-idak nian atu buka hatama golu.

Ekipa rua ne’e joga ho enerjétiku tanba hetan animadu másimu hosi adeptu ekipa ida-idak nian ne’ebé tuur haleu metin iha tribun Estádiu nian hodi haklalak no fó gloria ba sira-nia ekipa favoritu.

Ho euforia adeptu nian, jogu la’o dinámiku liután maibé ambisaun atu sai vensedór husi parte rua mós maka’as nune’e ekipa idaidak defende nia aan, rezultadu minutu ida ba minutu seluk ekipa rua la prodús golu ba malu.

Biar nune’e, sorte la haliis ba Atletico Ultramar iha minutu 45 tanba tenke sofre ba rezultadu ida. Katak, iha minutu ne’e, bola barrulu iha lina oin halo jogadór Hale utiliza kedan oportunidade hodi marka golu, muda rezultadu ba 1-0.

Hosi golu ne’e termina kedan minutu primeira parte nian rezultadu provizóriu 1-0 ne’ebé lidera hosi Ponta Leste.

Iha segunda parte, bainhira apitu lian hikas husi arbitru, jogu hahú, ekipa adversária rua lansa dezafiu ba malu atu fura guarda-rede idaidak. Kontra no atake ne’ebé másimu. Jogu moris. Maibé, Ponta Leste halo barreira ne’ebé metin la fó valda ba Ultramar hatama golu to’o minutu termina laiha tan golu ruma mak akontese ba ekipa rua.

Ikusmai, iha apitu ikus arbitru nian, Ultramar tenke simu duni derrota hosi Ponta Leste ho rezultadu permanente 1-0. Hosi rezultadu ne’e fó biban ba Ponta Leste iha direitu absoluta gaña pontu tolu, enkuantu Ultramar hela ho sofrementu.

Tabela klasifikasaun provizóriu

1. AD SLB pontu ualu (8)
2. Assalam FC pontu ualu (8) hanesan ho SLB maibé difernte golu
3. Porto Taibesse pontu hitu (7)
4. Ponta Leste pontu hitu (7) hanesan ho Porto maibé diferente golu
5. Karketu Dili FC pontu neen (6)
6. Emmanuel pontu neen (6) hanesan ho Karketu maibé diferente golu
7. Academica pontu lima (5)
8. Ultramar pontu haat (4)
9. Aitana FC pontu haat (4) hanesan ho Ultramar maibé diferente golu

Jornalista       :Hortencio Sanchez

Editór             : Rafael Ximenes de A. Belo