OÉ-CUSSE, 25 marsu 2023 (TATOLI) – Prezidente Repúblika, José Ramos Horta, akompaña hosi Prezidente Autoridade Rejiaun Administrativa Espesiál Oé-Cusse Ambeno (RAEOA), sábadu ne’e, hala’o vizita ofisiál ba projetu estrada nasionál hosi Pante Makasar liga ba sub-rejiaun Nítibe.
Hafoin remata vizita ofisiál ne’e, Xefe Estadu, informa, nia parte agradese ba komunidade sira iha partensia suku Lifau, Taiboko no Suni-Ufe nia kontribuisaun iha prosesu levantamentu dadus to’o faze konstrusaun.
“Ha’u kontenti ita haree estrada nasionál ho kilometru 11-resin, ho ponte lima, ita-nia natureza la’ós fasíl, dalaruma mota maran hela, maibé kuandu udan mai, ema no transporte laliu sei laiha ponte, purtantu orsamentu todan, maibé ha’u haree iha estrada sorin, agrikultura sira kontribui oferese ai-han hanesan haree no batar foin kuda no muda lutu, ida-ne’e nu’udar kontribuisaun ba prosesu dezenvolvimentu iha Oé-Cusse, ita agradese ba ida-ne’e, ” Xefe Estadu ko’alia iha Suku Suni-Ufe sub-rejiaun Nítibe.
Xefe Estadu fó parabéns ba povu Oé-Cusse no Autoridade RAEOA tanba konvida Prezidente Repúblika atu hala’o vizita ofisiál iha Oé-Cusse.
“Prinsipál liu maka ne’e, hahú halo projetu sira iha Oé-Cusse maibé mós projetu nasionál, halo buat ruma iha munsipíu seluk ba dezenvolvimentu rejionál, maibé integradu iha ita-nia mehi, projetu nasionál,” nia katak,
Prezidente Repúblika, apela bainhira Governu foun mai, persiza kontinuasaun ba infraestrutura sira-ne’ebé iha ba finalizasaun, ba programa ne’ebé Governu anteriór halo ona, Governu foun mai kontinua, bazea Planu Estratejiku Dezenvolvimentu (PED) 2011-2030
“Ida-ne’e mak bele la’o, tan ne’e mak ha’u apela ba Governu foun mai, semak forma Governu halo kontinuidade ba interese nasionál, ba ita-nia kredibilidade nu’udar parseriu internasionál,”
Iha biban ne’e, Prezidente Autoridade Arsénio Paixão Bano, agradese ba vizita ofisiál Xefe Estadu iha Oé-Cusse tanba aseita konvite ne’ebé maka Autoridade husu hala’o vizita primeira-véz hanesan Prezidente Repúblika ba povo Oé-Cusse.
“Estrada nasionál ne’e iha vias rua ba mai, sei halo ho kualidade tuir padraun ne’ebé Autoridade propoin, sei fó benefisiu ba investimentu seluk, tan ne’e ami kontenti tanba Prezidente bele haree direita progresu ne’ebé maka ami halo daudaun, iha sujestaun no mós apoiu morál, no kompromete atu kontinua fó apoiu ba RAEOA, para dezenvolvimentu ne’e la’o, ne’e ami agradese tebes,” nia orgullu.
Purtantu, projetu ne’e Autoridade RAEOA, hahú halo lansamentu iha 19 agusto 2022 no distánsia konstrusaun estrada nasionál ne’e hamutuk kilómetru 11 hanesan pakote I, hahú hosi ponte Noefafan suku Lifau, envolve suku Taiboko sub-rejiaun Pante Makasar to’o Oénunu suku Suni-Ufe sub-rejiaun Nítibe.
Projetu realibitasaun estrada nasionál, ezekuta hosi empreza internasionál PT. Waskita Karya, Tbk, ho valór kontratu millaun $23, ne’ebé autoridade RAEOA prevee hosi Orsamentu Jerál Estadu (OJE) 2022 ho durasaun servisu fulan 18.
Jornalista : Abílio Elo Nini
Editór : Rafael Ximenes de A. Belo
