OEKUSI, 21 Maiu 2026 (TATOLI) – Institutu Nasionál Seguransa Sosiál (INSS), kinta ohin hala’o enkontru koordenasaun ho Autoridade Rejiaun Administrativa Espesiál Oekusi Ambenu(RAEOA), atu emite notifikasaun ba funsionáriu reformadu na’in-47 iha Oekusi tanba simu direitu pensaun reforma dobru.
Xefe Gabinete ba Prezidente Konsellu Administrasaun INSS, Jecafriado Afulit Coa, informa enkontru koordenasaun atu buka solusaun kona-ba pagamentu pensaun reformadu kuaze ema na’in-47, ne’ebé maka husi INSS halo pagamentu, husi Autoridade Oekusi mós halo pagamentu.
“Maibé, ohin iha deskusaun ami hetan duni solusaun, primeiru husi Autoridade rasik sei fó notifikasaun ba pensiunista sira-ne’ebé osan tama dobru, tanba husi INSS no RAEOA mós halo pagamentu, entaun sei halo notifikasaun ba ema na’in-47 atu iha konkordánsia hodi reimbolsa filafali osan ba kofre Estadu, tanba osan ne’ebé simu foin mak fulan ida iha Janeiru 2026,” nia hateten iha Oekusi, ohin.
Notísia relevante:Funsionáriu reformadu na’in-1.985 simu sertifikadu apresiasaun
Nia esplika, erru ida-ne’e akontese ho mis-komunikasaun, tanba tuir lei atribui ba INSS atu responsabiliza másima ba pagamentu ba reforma inklui asuntu sosiál sira seluk, maibé husi Autoridade RAEOA ho Komisaun Funsaun públika (KFP), iha mis-komunikasaun relata informasaun ba INSS tarde, entaun mosu pagamentu dobru ba sira-nia direitu ne’ebé antes ne’e kontribui ona mensalmente 4% ba sistema seguransa sosiál.
Tan ne’e, nia dehan, iha enkontru koordenasuan ne’e, parte rua deside katak tuir rezolusaun Governu númeru 56/2024, loron 30 fulan Dezembru, Primeiru-Ministru (PM) fó kompeténsia ba INSS atu halo simulasaun kona-ba inskrisaun obrigatóriu no deklrasaun renumerasaun ba funsionáriu sira hotu.
“INSS halo ona simulasaun ba ministériu sira iha nasionál, no ohin mai koordena no konkorda hamutuk ho Autoridade RAEOA, atu implementa iha Oekusi, ho objetivu atu entidade empregadóra ka funsionáriu sira hotu, bele adere nia dadús pesoál bainhira idade to’o ona 60 ba leten, atu bele ba rekere nia direitu iha sistema seguransa sosiál,”
Notísia relevante:INSS halo ona pagamentu ba funsionáriu reformadu iha semana kotuk
Sekretáriu Rejionál ba Asuntu Planeiamentu, Francisco Loca, agradese tanba liuhusi koordenasaun nune’e bele hetan nia solusaun atu salva osan Estadu.
“Ami agradese ba INSS, tanba bel mai halo koordenasaun atu oinsa bele rezolve kona-ba pagamentu pensaun reforma sira, ne’ebé amia mi deside hamutuk atu emite notifikasaun ba sira na’in-47, tanba simu direitu dobru, nune’e bele hetan solusaun, tanba osan ne’e povu nian, tenki jere ho di’ak, ne’ebé ita sei informa Prezidente Autoridade, nune’e bele hasai notifikasaun,” nia hateten.
Jornalista: Abílio Elo Nini
