Alkatiri iha esperansa kaer-liman ho Xanana Gusmão
DILI, 26 marsu 2023 (TATOLI) – Sekretáriu Jerál partidu FRETILIN, Mari Alkatiri, iha esperansa loron ida sei kaer-liman ho Prezidente Partidu CNRT, Kay Rala Xanana Gusmão, iha Lagoa Tasi Tolu, Dili.
“Ha’u fiar iha loron ruma, ha’u ho Xanana sei hasoru malu iha fatin ida. Ha’u fiar buat sira-ne’e bele akontese. Karik nia mai misa iha kapela ne’ebé nia harii ne’e, ha’u mós sei mai enkontru iha uma ne’ebé FRETIIN harii ne’e, ami na’in-rua sei kaer liman,” Mari Alkatiri ko’alia iha ámbitu serimónia inaugurasaun uma sede, bairru Lagoa I, Tasi Tolu, domingu ne’e.
“Maibé atu kaer liman ho Xanana ne’e, laloos ha’u mak ba buka nia, tanba ha’u fundadór maibé bele hasoru malu ida iha dalan klaran depois mak ami bolu malu. Tanba ami sira-ne’e balun bele moris tán tinan lima, balun másimu bele tinan 10 ka bele moris tán to’o tinan 20, maibé atu ativu tán hanesan uluk lae ona,” nia tenik.
Sekretáriu Jerál FRETILIN ne’e haktuir, nu’udar fundadór ba nasaun ne’e iha mehi atu apoia komunidade bairru Tasi Tolu ne’e kleur ona.
Maibé rona katak bairru ida hetan ona konstrusaun kapela ida hosi Xanana, mosu hanoin ida kuandu Xanana harii ona kapela ida importante tebes ba komunidade sira, entaun sá ajuda saida maka nia bele fó ba bairru ida-ne’e, atu hamutuk ho kapela ne’e bele lori matak malirin ba rai ida-ne’e.
“Tanba kapela harii ona atu lori ema ba Lalehan entaun ho hanoin ida, ha’u harii fali uma ida atu hadi’a ema-nia vida iha rai uluk depois mak ba Lalehan,” nia hateten.
Eis Primeiru Ministru ne’e dehan, bainhira nia mai to’o iha fatin ne’e tanba hakarak atu inaugura uma ida-ne’ebé komunidade bairru Lagoa I rasik husu FRTILIN harii ona.
Enkuantu tuir dadus ne’ebé Agência TATOLI, asesu uma ida-ne’ebé FRETILIN apoia iha fulan-abríl tinan kotuk ba komunidade bairu Lagoa I, Tasi-tolu ne’e ho fundu $2.700.
Jornalista: Tomé Amado
Editór: Evaristo Soares Martins
