Autoridade lokál husu MAP reabilita irigasaun Uaibati iha Uatucarbau
VIQUEQUE, 27 marsu 2023 (TATOLI)— Autoridade lokál iha suku Uani-Uma husu Governu liuliu Ministériu Agrikultura no Peska (MAP) atu halo reabilitasaun ba sistema irigasaun husi Uaibati liga ba natar Komu-Oli, ne’ebé daudaun kondisaun hahú aat iha postu Uatucarbau, munisípiu Viqueque.
“Daudaun ne’e, ami-nia komunidade sira-nia preokupasaun maka kondisaun irrigasaun parte Komu-Oli ne’ebé maka besik kotu. Se ida-ne’e kotu entaun iha epoka tinan ne’e komunidade sira labele halai sira-nia natar iha parte Komu-Oli”, Xefe Suku Uani-Uma, Antonio de Jesus, hateten ba Agência Tatoli, iha sede suku Uani-Uma, segunda ne’e.
Iha tinan 2016, Governu liuhosi Ministériu Agrikultura no Peska (MAP) halo ona levatamentu ba planu dezeñu no Bill of Quantity, maibé to’o agora seidauk iha rezultadu ba konstrusaun irrigasaun Komu-Oli.
“Irrigasaun ne’e ha’u hato’o beibeik, hafoin ha’u rona dehan konstrusaun irrigasaun ne’e entrega fali ona ba UNDP maka finansia hodi halo, maibé agora tama ona tinan 2023 seidauk. Ami mós seidauk hatene agora prosesu to’o ne’ebé karik la hatene loos, karik UNDP labele rezolve ita buka dalan seluk “, nia aprezentan.
Nune’e, nia relata foin lalais fó hatene mós Diresaun Planu Dezenvolvimentu Integradu Munisipal (PDIM) hodi buka tuir informasaun ne’e ba UNDP hodi resolve lalais.
“Kona-ba natar Kumu-Oli ne’e ita-nia agrikultór sira kada tinan halo natar dala rua, maibé distribuisaun bee ba natar maka la sufisente. Tan ne’e ha’u ejize ba Governu hodi hadi’a, se la hadi’a ne’e mak iha maiu ne’e, ita-nia komunidade sira labele halo natar tanba laiha irrigasaun alternativu ruma hodi subtitui ba”, nia sujere.
Enkuantu natar área Kumu-Oli kuaze ektare 350 ne’ebé fó benifísiu ba abitante husi suku Uani-Uma inklui abitante husi suku Irabin de Baixo.
Tuir dadús dadus iha suku Uani-Uma, kompstu hosi aldeia lima ho totál uma-kain 468 ho totál populasaun 2.223.
Jornalista: Vitorino Lopes da Costa
Editór : Florencio Miranda Ximenes
