EKONOMIA, BOBONARO, HEADLINE, MUNISÍPIU

EDTL sei troka poste elétrika tuan hosi Nunura to’o Lahomea

EDTL sei troka poste elétrika tuan hosi Nunura to’o Lahomea

Postu elétrika antigu sira iha kapitál Maliana, munisípiu Bobonaro. Imajen Tatoli/Sérgio da Cruz.

MALIANA, 27 marsu 2023 (TATOLI) – Eletrisidade Timor-Leste, Empreza Públika (EDTL,E.P), munisípiu Bobonaro, planeia troka poste elétrika taun sira hahú hosi estrada nasionál diresaun Nunura, suku Tapo-Memo ba to’o suku Lahomea, postu administrativu Maliana.

Notísia relevante: EDTL Bobonaro garante eletrisidade lakan 24 oras iha loron eleisaun

“Komesa hosi Nunura to’o Lahomea, agora ita sei uza ahi-rin ka poste tuan ne’ebé mak peninggalan Indonézia nian, ita haree lahuk ona, komesa sa’e mai iha Tunubibi ba to’o pemancar ne’e tuan hotu ona, entaun ida-ne’e hakarak ka lakohi urjentimente sei troka,” Koordenadór EDTL,E.P munisípiu Bobonaro, Mário de Jesus ko’alia iha Maliana, segunda ne’e.

Responsável EDTL,E.P munisípiu Bobonaro ne’e, halo ona dezeñu no orienta tékniku sira tún ba terrenu halo hotu ona levatamentu ba poste mídia no baixa-tensaun ne’ebé sei troka ho distánsia hamutuk kilómetru 10.

“Iha tinan ida-ne’e atu fó-sai tama iha Projetu Eletrifikasaun Nasionál (PEN), ita-nia nai-ulun sira deside ona katak iha tinan ne’e bele troka ona poste antigu sira-ne’ebé ami levanta tiha ona,” nia katak.

Marcos Pereira Assis nu’udar joven iha kapitál Maliana, sente kontente tanba EDTL iha ona planu atu troka poste hirak-ne’e, no espera bele aselera prosesu konkursu públiku ba projetu ne’e.

“Ha’u hanoin ahi-rin sira ne’e merese troka duni, tanba ita haree hanesan ita ema ida karik katuas ho ferik hotu ona. Ne’e dezde okupasaun Indonézia mai to’o agora ita sei uza, balun halis hotu ona, entaun ita ta’uk mak ahi lakan hela derrepente nia monu kona ema nia uma ahi bele haan mutuk kedas,”nia katak.

Enkuantu tuir dadus 2022 postu administrativu Maliana iha aldeia 39, suku hitu ho totál populasaun 32,543, komposta hosi mane 16,332, feto 16,251, ho totál xefe família 6,067.

Notísia relevante: EDTL Bobonaro esforsu fornsese eletrisidade ba komunidade Balibo-Atabae

Jornalista   : Sergio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!