DILI, 27 marsu 2023 (TATOLI)-Parlamentu Nasionál (PN), liu hosi reuniaun plenária, segunda ne’e, aprova ona proposta lei númeru 51/V(5a)-Medida tutela legalidade urbanístika iha faze jeneralidade.
“Rezultadu votasaun a-favór 47, kontra no abstensaun 0, nune’e proposta lei Medida tutela legalidade urbanístika iha faze jeneralidade aprovadu iha faze jeneralidade,” Prezidente Parlamentu Nasionál, Aniceto Longuinhos Guterres Lopes, informa iha sala plenária PN.
Notísia relevante:https://tatoli.tl/2023/02/01/konsellu-ministru-aprova-medida-tutela-legalidade-urbanistika/
Ho aprovasaun ne’e, meza PN haruka hikas inisiativa hosi lejislativa ne’e ba iha komisaun E ne’ebé trata asuntu Infraestrutura hodi diskute kada artigu ho espesífiku liután antes PN halo diskusaun iha faze espesialidade.
Tuir relatóriu paresér komisaun E katak proposta lei ne’e kumpre iha jeneralidade tanba haree ba rekezitu formál, konstituisionál, legál no mós rejimentál hodi bele apresia iha plenária.
Husi análiza kona-ba inisiativa lejislativa ho propózitu maka atu regula aktu administrativa nesesáriu hodi garante kumprimentu lejislasaun relativa ba lisensiamentu operasaun urbanístika no edifikasaun hanesan instrumentu jestaun territoriál.
Enkuantu, expozisaun motivu ba proposta lei ne’e, ho entrada iha vigór dekretu-lei númeru 9/2022, 24 fevereiru, ne’ebé estabelese rejime jurídiku edifikasaun no urbanizasaun, ne’ebé regula kona-ba lisensiamentu kontrusaun utilizasaun edifikasaun, nesesáriu hodi atribui ba Governu feramentu legál no adekuadu nune’e permite ba garante aplikasaun rejime.
Iha artigu 50 sita iha diploma, ‘Obra sira ne’ebé ezekuta tuir akordu ho projeitu aprovadu, iha violasaun norma legál no regulamentu aplikável, sujeita medida kona-ba tutela legalidade determina iha própriu diploma.
Proposta lei ne’e iha artigu hamutuk 17 hosi kapítulu I kona-ba dispozisaun inisiál ho artigu tolu, kapítulu II, Medida tutela legalidade urbanistika ho artigu 10.
Kapítulu III kona-ba rejime espesiál ho artigu ida, kapítulu IV dispozisaun finál ho artigu haat.
Jornalista: Nelson de Sousa
Editór: Agapito dos Santos
