Projetu 44 hetan sertifikadu ambientál hosi SEA no ANLA,I.P
DILI, 27 marsu 2023 (TATOLI)—Sekretária Estadu Ambiente (SEA) hamutuk Autoridade Nasional Lisensiamentu Ambientál, Institutu Públiku (ANLA,I.P) segunda ne’e, atribui sertifikadu ambientál nian ba projetu 44 ne’ebé sei kaer hosi empreza privadu no Governu nian.
Sekretáriu Estadu Ambientál (SEA), Demétrio do Amaral de Carvalho, hateten, objetivu hosi isensa ambientál ne’e hodi garante dezenvolvimentu iha Timór tuir padraun dezenvolvimentu sustentável.
“Objetivu hosi lisensa ambientál ne’e, oinsá tenke halo planu estudu ambientál sira nomós planu jestaun ambientál hodi jere poténsia sira iha futuru hodi hamenus kustu risku sira. Tanba, lisensa ambientál ne’e sai mata dalan ida hodi sira jere sira-nia projetu no oinsá labele fó risku ba ambiente no ba komunidade,” Demétrio do Amaral de Carvalho, hateten ba jornalista sira iha Acait, Dili.
Nia dehan, Governu iha inisativa halo dekretu lei kona-ba lisensa ambientál ne’e, atu oinsá fasilita empreza sira hala’o atividade tanba atividade dezenvolvimentu ne’e, kualker projetu sempre iha impaktu ba ambiente.
Iha fatin hanesan, Prezidente ANLA,I.P, António Lelo Taci, hateten projetu 44 ne’ebé hetan sertifikadu ne’e, 30 projetu foun no projetu 14 antigu ona no halo fali renovasaun.
“Hosi projetu 44 ne’e, iha empreza rua ne’ebé implementa hela mega projetu hanesan, projetu Sistema Drainajen iha Dili ne’ebé responsabiliza hosi Bee Timor-Leste, Empreza Públika (BTL,E.P) no Timor Plaza,” nia dehan.
Sertifikadu ambientál sira ne’ebé atribui ne’e iha kategória tolu, mak hanesan kategória A (4), B (4) no kategori C iha 36.
António Lelo Taci, afirma, projetu haat ba kategória A ne’e, mai hosi kompañia hanesan, Dili Drainage Infrastructure Upgrading Project (DDIUP), Dili Development Company, Lda, Pelican Paradise no Heineken. Ba Kategória B ne’e rasik, hosi empreza Discovery, Austin Beverage S.A., Hiuan Mei no Aitutu.
Vise Prezidente BTL,E.P, Elisabeth Amaral, hateten sertifikadu lisensa ambiental ne’ebé SEA no ANLA,I.P atribui ba sira ne’e di’ak tebes tanba oinsá atu fasilita sira-nia servisu iha terrenu.
“Servisu lisensa ambientál ne’e di’ak tebes ba projetu DDIUP ne’ebé apoia implementasaun ba projetu ne’e finansiadu hosi Millennium Challenge Cooperation (MCC) ho valór milliaun $400.
Projetu ida ne’e, boot tebes ne’ebé presiza servisu ne’ebe iha koordenasaun integra entre liña miniteriál sira hodi implementa ba projetu ne’e.
Reprezentante hosi kompañia Dili Development, Lda, Tony Jape, hato’o agradese tebes ba ANLA,I.P tanba iha Timor-Leste atu hetan sertifikadu lisensiamentu ne’e nia prosesu di’ak no lais kompara ho nasaun sira seluk.
Enkuantu, hahú hosi janeiru to’o 2023 ANLA,I.P distribui ona sertifikadu lisensa ambientál hamutuk 113. Ne’ebé kategória foun hamutuk 67 projetu no renovasaun 46. Nune’e atribuisaun sertifikadu ne’ebé fo hahú hosi 2019 to’o 2022 hamtuk 740.
Jornalista : Arminda Fonseca
Editora : Armandina Moniz
