DILI, 28 marsu 2023 (TATOLI) – Ministériu Solidariedade Sosiál no Inkluzaun (MSSI) halo ona pagamentu ba subsídiu Bolsa da Mãe Jerasaun Foun (BdMJF) ba benefisiáriu hamutuk 20.560 iha munisípiu Ainaro, Bobonaro no Rejiaun Administrativa Espesiál Oé-Cusse Ambeno (RAEOA).
“Hosi fulan-juñu 2022 to’o mai agora, ita selu ona benefisiáriu sira hosi munisípiu tolu hamutuk 20.560 ho osan montante $491.475”, Diretór-Jerál MSSI, Florêncio Pina Dias Gonzaga, hatete ba Tatoli, via telefone, tersa ne’e.
Hosi totál ne’e, Ainaro iha benefisiáriu 5.529, kompostu hosi inan isin-rua 923 no labarik idade entre 0-6 hamutuk 4.606, ne’ebé inklui ema ho defisiénsia 20; Bobonaro iha 5.577 (inan isin-rua 1.353 no labarik 5.666, inklui labarik ho defisiénsia 18); no RAEOA iha 6.215 (inan isin-rua 1.450 no labarik idade 0-6 iha 6.562, inklui labarik ho defisiénsia 38).
Pagamentu ba benefisiáriu iha Ainaro gasta ona montante $81.890, Bobonaro $94.125 no RAEOA $182.655.
“Agora osan ne’ebé mak seidauk selu ne’e hela $133.805, maibé ita-nia ekipa kontinua halo pagamentu”, nia afirma.
MSSI identifika benefisiáriu BdMJF faze daruak iha munisípiu haat 18.850
Diretór-Jerál Florêncio Dias Gonzaga informa katak ekipa MSSI identifika ona benefisiáriu BdMJF ba faze daruak iha munisípiu Covalima, Liquiçá, Manatuto no Viqueque hamutuk 18.850.
“Hosi munisípiu haat ne’ebé ita identifika ona, ita seidauk kria lista pagamentu, tanba sei iha insert dadus. Maibé, benefisiáriu ne’ebé mak ita identifika ona ne’e hamutuk 18.850”, dirijente ne’e dehan.
Hosi númeru benefisiáriu ne’e, Covalima iha 3.771, husi ne’e inan isin-rua hamutuk 644 no labarik idade 0-6 hamutuk 3.470, inklui ema ho defisiénsia 18; Liquiçá 3.413 (inan isin-rua 531 no labarik idade 0-6 3.262, inklui ema ho defisiénsia 8), Manatuto 2.685 (inan isin-rua 408 no labarik 2.626, inklui ema ho defisiénsia 16) no Viqueque 2.707 (inan isin-rua 341 no labarik 2.800, husi númeru ne’e ema ho defisiénsia 17).
Tuir dekretu lei n.u 22/2021, 10 novembru, iha tinan 2022, implementa programa BdMJF iha Ainaro, Bobonaro ho RAEOA no iha 2023 haluan tan ba munisípiu haat mak Liquiçá, Covalima, Manatuto no Viqueque.
Programa ne’e nia objetivu mak atu redús má nutrisaun no pobreza iha Timor-Leste ho nia alvu mak inan isin-rua no labarik sira.
Notísia relevante: Bolsa da mãe jerasaun foun motiva inan-aman lori oan hakbesik ba fasilidade saúde
Jornalista: Osória Marques
Editora: Maria Auxiliadora
