DILI, 28 marsu 2023 (TATOLI)-Deputadu hosi bankada Partidu Libertasaun Populár (PLP), Noé da Silva (Buka Tuir”, husu Ministéiru Saúde (MS) atu koloka médiku permanente iha postu saúde Saelari, postu administrativu Laga, munisípiu Baucau.
“Foin lalais iha semana kotuk halo kontaktu eleitorál iha baze, simu preokupasaun katak iha postu saúde iha Saelari to’o ohin loron no minutu ida-ne’e, pesoál saúde laiha. Lahatene tanbasá, entaun ita-nia líder komunitáriu no komunidade sira husu atu tenke koloka ona ita-nia pesoál saúde iha fatin refere,” Deputadu Noe da Silva “Buka Tuir” hato’o liuhosi intervensaun iha reuniaun plenária PN, tersa ne’e.
Alíende ne’e, Deputadu hosi bankada Governu ne’e foti preokupasaun ambulánsia aat iha postu administrativu Baguia, situasaun ne’e agora halo ambulánsia laiha, nune’e presiza ambulánsia ida atu aloka fila-fali ba iha ne’eba hodi fasilita sidadaun sira-ne’ebé difikuldade ba fasilidade saúde nian bele transforma mai Baucau.
“Ida-ne’e atu tau atensaun másimu postu administrativu tomak presiza ambulánsia,” nia hateten.
Iha reuniaun plenária ne’e levanta mós preokupasaun seluk hosi Deputadu Fretilin António dos Santos, kona-ba situasaun udan rezulta infraestrutura iha Ermera aat hanesan mota tolu iha Gleno, ida ba iha Ermera antiga nian rezulta ona populasaun barak ninia rai lakon no agora liu-liu ba eskola universidade ETCI problema boot bee tama to’o laran.
“Segundu ida klaran merkadu nian sobu kuaze ema-nia balun lakon ona kauze 300-400 metru no fízikamente ema-nia haris fatin sira-ne’e lakon, Governu tau ona atensaun haruka ona unidade rua hosi IGE ba iha ne’eba, maibé ida merkadu ne’e haruka ekipamentu pezadu kiik ida ba iha ne’eba hiit labele no foin normaliza to’o minutu 30 dehan mina laiha, hanoin presiza kontrolu másimu atu ba salva povu,” nia dehan.
Aleinde ne’e, liga ba estrada horisehik lokraik kuaze hosi Gleno ba Ermera antiga ponte boot ida monu totál, depois ponte kiik rua hahú hosi kruzamentu Letefoho nian ba, entaun nia afeta ba postu Ermera antiga, Hatualia zona A no B durante fulan ida la funsiona.
“Ida fali hosi estrada Gleno, Letefoho, Atsabe ne’e mós dadeer normaliza lorokraik udan monu rai maneira óinsa mós mota sobu hotu. Agora tama ba suku sira liuliu suku Estadu ho Remarhei ponte boot ida ho ponte kiik tolu ba hotu,” nia dehan.
Deputadu hosi bankada Governu ne’e dehan, agora atu tama ba eleisaun parlamentár tenke normaliza lalais hodi fasilita haruka materiál sensitivu sira.
“Agora dalan alternativa ida ba Ermera antiga ba Hatulia zona A no B, ida mak liuhosi suku Poetete, soké mota mak labele. Governu tenke haree to’o ida-ne’e, tanba dalan alternativa mak ida-ne’e,” nia dehan.
Deputada PLP, Maria Angelina Sarmento, foti preokupasaun estrada iha postu administrativu iha Laclubar, iha mota Weurun nian ne’ebé foin daudaun kuaze atu lori dezástre ba populasaun iha ne’eba no iha mós estrada mota Weurun nia leten ne’ebé fó ameasa ba movimentu karreta sira ba iha ne’eba, nune’e hanoin Governu tenke halo intervensaun imediata.
Nune’e mós estrada ba postu administrativu Soibada to’o mota Buaraha no liu mai fali iha suku Manelima to’o iha kruzamentu Laclubar nian, Governu presiza iha desizaun ida klaru no lalais ba estrada sira-ne’e tanba bele kauza ba movimentu transporte públiku.
Deputadu CNRT, Leandro Lobato, levanta kona-ba ajénsia faan pulsa eletrisidade, depois EDTL estabelese ema hotu antrian forma naruk loro-loron tanba liga ho liña ne’ebé difikulta tebes kle’ur, ida-ne’e ema-ne’ebé pulsa hotu ba sosa hein to’o ida oras ida ka rua, nune’e presiza tau atensaun.
Jornalista : Nelson de Sousa
Editór : Cancio Ximenes
