Durante fulan tolu, postu saúde Uaitame rejista pasiente ISPA 230
VIQUEQUE, 28 marsu 2023 (TATOLI)- Responsavel postu Saúde iha suku Uaitame, postu administrativu Uatulari, munisípiu Viqueque, Joanita Amaral, relata hahu hosi janeiru to’o marsu ne’e, konsege rejista moras Inspesaun Respiratóriu Aguda (ISPA) na’in-230.
“Durante ne’e, ami rejista kazu moras ISPA, diarea no moras sira seluk. Maibé moras ne’ebé númeru aas liu maka moras ISPA ne’ebe daudaun ne’e tuir hela tratamentu no simu ai-moruk ba hodi bele rekupera,” hateten responsavel ne’e ba jornalista sira, iha postu saúde Uaitame, tersa ne’e.
Kazu moras ISPA aas tanba kauza husi rai rahun no komunidade balun hemu bee ne’ebe la nono ka tasak. Alende ne’e rejista mos moras diaria na’in-31 no moras sira seluk 127.
“Estoke ai-moruk la sufisisiente, nune’e ami hato’o ona pedidu ba sentru saúde Uatulari, maibé sira dehan ba ami katak estoke maka laiha. Nune’e sira dehan ba ami estoke tama maka sira foin distrubui mai postu Uaitame”, nia lamenta.
Kada loron postu saúde loke hahú dadeer to’o lokoraik hodi fó atendimentu ba abitante. Enkuantu númeru pesoal saúde serbisu iha postu Saúde Uaitame hamutuk na’in-lima, kompostu husi parteira, enfermeira no saúde públika.
Jornalista : Vitorino Lopes da Costa
Editór : Florencio Miranda Ximenes
