DILI, 28 marsu 2023 (TATOLI)—Deputadu hosi bankada CNRT iha Parlamentu Nasionál (PN), Ricardo Baptista, husu Governu atu pronúnsia transferénsia kartaun eleitorál hosi postu ba munisípiu Ataúro tanba eleisaun parlamentár besik ona.
Notísia Relevante: STAE Ataúro husu Notariadu fasilita komunidade halo BI-RDTL-pasaporte
“Dala ita tan relasiona ho transferénsia eleitorál Ataúro nian hosi postu ba munisípiu, ida-ne’e ha’u foti dala hira ona maibé nunka rona pronúnsia ruma hosi membru Governu ne’ebé tutela ba,” Deputadu Ricardo levanta liu hosi reuniaun plenária PN, tersa ne’e.
Nia hateten, transferénsia eleitorál muda hosi postu ba munisípiu to’o ohin loron no horisehik nia parte simu nafatin kontaktu hosi líder komunitáriu sira hodi husu Governu atu pronúnsia netik liafuan ruma.
“Kona-ba transferénsia eleitorál hosi postu ba munisípiu, tanba agora ita-nia atualizasaun ba eleitorál foun ne’ebé halo ramata iha 30 marsu agora,” nia dehan.
Agora iha Ataúro atu muda eleitorál hosi postu ba munisípiu tenke muda hosi billete identidade ho sertidaun RDTL tenke muda hotu hafoin mak muda eleitorál, no foin daudaun ekipa ida hosi notariadu ba to’o iha Ataúro sira ba rejistu foun de’it maibé sira-ne’ebé mak atu muda tenke lori hotu fila-fali mai Dili.
“Maibé to’o agora ka ohin seidauk lori fila-fali ba no seidauk atu trata eleitorál atu muda hosi postu ba iha munisípiu, ami ko’alia ida-ne’e tanba ita-nia eleisaun parlamentár besik ona no 30 marsu agora taka ona atualizasaun, resensiamentu foun no mudansa hosi postu Ataúro ba munisípiu,” nia hateten.
Nune’e, nia hateten, hanesan Ataúro oan hakarak rona Governu pronúnsia netik buat ruma atu eleitorál ne’ebé postu administrative nian agora nafatin atu bele tuir eleisaun mai ka lae.
“Se la tuir eleisaun, entaun maiória povu iha Ataúro labele tuir eleisaun, tenke pronúnsia netik liafuan ruma kona-ba ida-ne’e. Se dehan katak Ataúro bele nafatin ho eleitorál tuan ne’ebé ho postu bele tuir eleisaun, entaun pronúnsia sai tiha,” nia dehan.
Hatán ba ida-ne’e, Ministru ba Asuntu Parlamentár no Komunikasaun Sosiál (MAPKOMS), hateten nia-parte sei ko’alia ho Ministru Administrasaun Estatál (MAE) hodi haree ba kona-ba kestaun ne’e.
Jornalista : Nelson de Sousa
Editór : Cancio Ximenes
