Implementasaun programa merenda eskolár iha Covalima sei hahú abríl
COVALIMA, 28 marsu 2023 (TATOLI)—Servisu Edukasuan Munisípiu Covalima liuhosi Departamentu Jestaun Programa Edukasaun Covalima sei implementa programa merenda eskolár hahú iha fulan-abril tinan 2023 tanba orsamentu tarde.
“Agora ita elabora hela planu atu implementa programa merenda eskolár, ha’u ho finansa munisípiu aborda hamutuk ona orsamentu atu halo implementasaun programa merenda eskolár. Ohin Administradór Munisípiu Covalima, aprova ita hein loron 03 abríl hahú implementa ona merenda eskolár ba estudante iha Covalima,” Xefe Departamentu Jestaun Programa Edukasaun Covalima, Gregorio Ferreira Afonso, hateten ba Agência Tatoli, iha Santa Rosa, tersa ne’e.
Tuir kalendáriu implementasaun programa merenda eskolár hahú fulan-janeiru maibé to’o ona fulan-marsu mós seidauk implementa programa merenda eskolár, nune’e fó impaktu mundansa oráriu implementasaun merenda eskolár.
Bazea ba planu nasionál implementa programa merenda eskolár ba tinan 2023 durante loron 164, maibé tanba administradór munisípiu Covalima hakarak estudante sira iha eskola públiku no privadu han hotu entaun implementa merenda eskolár durante loron 148.
Redús ona loron implementa merenda eskolár maibé nafatin fó impaktu tanba hahú fulan-janeiru no marsu ita la fó han ba estudante sira iha eskola ne’ebé eziste iha Covalima,” nia dehan.
Ho impaktu ne’ebé iha servisu edukasaun Covalima hanoin hamutuk ho asesór hahú implementa merenda eskolár iha loron 03 abríl 2023 iha eskola ne’ebé eziste iha Covalima.
Antes ne’e, implementasaun programa merenda eskolár ba estudante pre-eskolár públiku no ensinu báziku públiku de’it, maibé ba tinan ne’e implementa hotu merenda eskolár iha eskola privadu no públiku hamutuk 135 ho totál estudante 18,402 no nia orsamentu $1,143,937.20.
Jornalista : Celestina Teles
Editór : Cancio Ximenes
