DILI, 28 marsu 2023 (TATOLI) – Reuniaun Konsellu Ministru (KM) extra-ordináriu Komunidade Ko’alia Lian Portugés (CPLP, sigla portugés) ne’ebé realiza iha Luanda, Kapitál Angola, hodi halo preparasaun ba simeira ne’ebé akontese jullu mai ne’e iha São Tomé e Principé no iha okaziaun ne’e halo mós revizaun ba estatutu balun organizasaun nian.
“Enkontru ida ne’e, konsidera hanesan enkontru ida ne’ebé atu aprova asuntu sira mak hanesan revizaun ba estatutu komunidade no implementasaun kooperasaun ekonomia iha CPLP,” tenik iha komunikadu ne’ebé Agência TATOLI assesu hosi media Ministériu Negosiu Estranjeiru no Kooperasaun (MNEK), tersa ne’e.
Reuniaun KM extra ordinariu ne’e ba dal-XVI, iha ne’e Timor-Leste reprezenta hosi Ministra MNEK Adaljiza Albertina Xavier Reis Magno ho ekipa.
Iha ámbitu reuniaun ne’e loke direta hosi Ministru Relasaun Exteriór Repúblika Angola, hanesan Prezidente em-ezersísiu CPLP, Téte António.
Reuniaun ne’e rasik realiza ho tópiku “O Papel dos Mares e Oceanos na Projeção”.
Jornalista : Hortencio Sanchez
Editór : Rafael Ximenes de A. Belo
