DILI, 28 marsu 2023 (TATOLI) – Ministériu Agrikultura no Peska (MAP) liuhosi Diresaun Servisu Agrikultura Munisípiu Dili hamutuk ho kompaña Heineken kuda mangrove oan hamutuk-500 iha tasi ibun Hera.
Diretór Servisu Agrikultura Munisípiu Dili, Teofilo Maia, hateten objetivu hosi kuda ai-oan hirak ne’e atu proteze balada fuik sira, halo tasi-ibun sai matak no tahan tasi bainhira laloran maka’as.
“Kuda mangrove barak iha tasi-ibun ne’e importante tebes atu salva bainhira laloran maka’as baku mai ai-horis hirak ne’e mak sei tahan, bele sai hanesan mós fatin para-animal fuik sira bele hamahan aan ba, ikan sira bele moris iha nia okos, boek sira no animal oioin, atividade ida ne’e oferese ai mangrove oan no Heineken fasilita hahan ba ema sira mai kuda ne’e han,” Diretór Teofilo Maia ba jornalista-sira iha Hera, tersa ne’e.
Nia dehan, programa kuda mangrove entre MAP no Heineken ne’e sei kontinua nafatin ba oin sei la para de’it iha ne’e.
Jestór kompaña Heineken, Pisey Hoeung hateten, programa ne’ebé hala’o dadaun tanba hetan kooperasaun hamutuk ho MAP tuir estratejia ida ne’ebé haree liu ba ambiente tanba situasaun mudansa klimátiku maka’as iha mundu.
“Kuda ai-oan ne’e hanesan ami-nia programa estratéjiku ida. Ami mós koopera hamutuk ho Ministériu Agrikultura hodi realiza programa ne’e. Ami-nia programa ne’e hala’o tanba haree ba mudansa klimátiku ne’ebé maka’as entaun ami kria programa ne’e,” Jestór ne’e relata.
Nia hatutan, programa Heineken nian ne’e permanente ona ba oin iha ona planu atu kuda ai-oan barak liu tan atu fó matak ba rai hodi fó mahon ba ema no animál sira.
“Ami sei kolabora nafatin ho Ministériu Agrikultura no mós komunidade sira iha fatin hotu atu kuda ai-oan barak liutan liu-liu mangrove. Ida ne’e mak ami nia hakarak,” nia hatete.
Programa kuda mangrove ne’e envolve direita hosi komunidade Hera, estudante Universidade Nasionál Timor-Lorosa’e (UNTL) Hera, funsionáriu Heineken no funsionáriu MAP.
Jornalista : Hortencio Sanchez
Editór : Rafael Ximenes de A. Belo
