MALIANA, 29 marsu 2023 (TATOLI) – Hafoin akontese udan no anin rezulta estrada kotu, difikulta kompañia implementadór mobiliza materiál kontrusaun sira ba terrenu hodi aselera Projetu Eletrifikasaun Nasionál (PEN) ne’ebé implementa iha suku Raiheu, postu administrativu Cailaco, munisípiu Bobonaro.
Xefe suku Raiheu, Ventura Maria Tai, informa, udan ho anin-boot akontese iha fulan nee nia laran konsege sobu estrada, nune’e implementasaun projetu eletrifikasaun ba Daruwasa no aldeia Oho-Anan atraza.
Notísia relevante: Abitante Raiheu kontinua sunu lampariña
“Situasaun ne’e mak difikulta kompañia lori materiál ba ita-nia suku, maibé semana kotuk, tékniku sira-ne’ebé serbisu hamutuk ho família balun, hulan deit besi-riin ne’e hakat liu ba estrada sorin, sira kontinua esforsu,” nia informa ba Agência Tatoli, iha Maliana, kuarta ne’e.
Xefe suku Ventura konfirma, estrada sira-ne’e kotu kuaze kilómetru rua, tanba ne’e provizóriu transporte roda-haat hosi diresaun Hali-Mesak labele ultrapasa mai suku Rai-Heu.
Enkuantu kona-bá motorizada ne’ebé atu asesu ba-mai mós difisil tebes, tanba bainhira ema ruma atu halo viajen presiza ema na’in-rua ka tolu ajuda malu dudu motorizada hafoin bele ultrapasa ba fatin destinasaun.
“Nia impaktu ne’e ba komunidade labele asesu ba merkadu, depois vendedór sira mós iha suku ne’e mós labele mai sosa sasán iha merkadu Maliana hodi ba fa’an, sira-nia produtu mós susar atu lori mai fa’an iha merkadu,” nia katak.
Iha semana kotuk, nia parte hatama proposta direitamentu iha Prezidente Konsellu Administrasaun Institutu Jestaun Ekipamentu Apoiu Dezenvolvimentu Infrastrutura, Institutu Públiku (IGEADI,I.P), maibé to’o agora tékniku sira seidauk observa no halo levantamentu dadus.
“Ha’u hanoin semana ida ka rua tán mak sira la mai foti dadus, ida-ne’e ha’u hanoin ami hanesan autoridade lokál sei esforsu no tenta fila-fali ba prezidente IGE atu nune’e bele orienta lalais tékniku sira, nune’e ita aselera servisu normalizasaun hodi prepara mós ba eleisaun parlamentár,” nia dehan.
Enkuantu suku Raiheu komposta hosi aldeia tolu; Lete-Aitutu, Oho-Ana, Darabasa ho totál na’in-1,723 no xefe família 165.
Notísia relevante: Komunidade Raiheu loke estrada foun kilómetru ha’at
Jornalista: Sergio da Cruz
Editór: Evaristo Soares Martins