DILI, 29 marsu 2023 (TATOLI) – Konsellu Ministru aprova aprezentasaun rekandidatura Zacarias Albano da Costa ba kargu Sekretáriu-Ezekutivu ba Komunidade País ho Lian Portugés (CPLP) ba mandatu tinan rua-tán (2023-2025).
“Eleisaun ba Sekretáriu Ezekutivu CPLP nian sei konfirma iha Simeira Xefe Estadu no Governu ba Komunidade País ho Lian Portugés nian tuir-mai ne’ebé sei hala’o iha fulan-jullu 2023, iha São Tome no Prínsipe”, portavós interinu Governu nian, Joaquim Amaral, informa iha Palásiu Governu, kuarta ne’e.
Zacarias Albano da Costa asume knaar nu’udar Sekretáriu-Ezekutivu CPLP iha períudu dahuluk iha tinan 2021-2023.
Tuir estatutu CPLP nian, bainhira mandatu Sekretáriu-Ezekutivu termina bele re-nomeia dala-ida tan tuir desizaun Xefe Estadu no Governu-sira membru CPLP.
Eis-membru Parlamentu Nasionál hosi Bankada Partidu Sosiál Demokrata (PSD) ne’e simu pose hodi asume knaar Sekretáriu-Ezekutivu CPLP iha Luanda, 17 jullu 2021.
Zacarias Albano da Costa, moris iha Remexiu (Aileu), iha loron 16 janeiru 1964. Nia mós iha esperiénsia asume knaar importante no estratéjiku iha ajénsia internasionál lubun iha Timor-Leste dezde tempu UNTAET to’o mai Timór restaura nia independénsia iha 20 maiu 2002.
Notísia relevante: https://tatoli.tl/2021/05/10/hahu-knaar-jullu-zacarias-albano-agradese-konfiansa-nuudar-sekretariu-cplp/
Jornalista: Antónia Gusmão
Editora: Maria Auxiliadora
