DILI, 29 marsu 2023 (TATOLI)—Komisaun A trata asuntu Justisa no Konstituisionál iha Parlamentu Nasionál (PN), kuarta ne’e, finaliza ona hala’o audiénsia públika ho entidade relevante sira ba projetu-lei Orden ba Médiku Timor-Leste.
Notísia Relevante: Meza PN baixa projetu-lei Orden Médiku Timor-Leste ba komisaun A
“Hotu-hotu ne’ebé hola parte iha área saúde rona hotu ona hosi Asosiasaun Médiku, Ministéiru Saúde, advogadu no espesialista saúde nian balun, agora hein halo relatóriu no semana oin ita hatama ba meza PN,” Prezidente komisaun A, Joaquim dos Santos, hateten ba Agência TATOLI, iha PN.
Bainhira komisaun A submete ona relatóriu no paresér ba inisiativa lejislativa ne’e meza PN mak sei ajenda diskusaun faze jeneralidade iha reuniaun plenária.
Deputadu Joaquim dehan, durante audiénsia públika entidade relevante sira hanesan médiku sira-nia hanoin ba inisiativa ne’e sente kontente tanba tinan 20 ona bainhira laiha orden ida-idak hala’o konforme nia hakarak.
“Ema hosi rai-li’ur mai iha rai-laran atu serbisu hanesan médiku tenke rejistu iha orden médiku. No ita eskola hotu iha UNTL sai doutór (médiku) hosi UNTL atu ba serbisu sai hanesan médiku tenke rejista lai iha orden médiku. Se la rejistu, labele atu regula,” nia dehan..
Nune’e mós, Estadu bele kontribui tanba ida-ne’e objetivu atu hadi’a kualidade asisténsia médika ba saúde públika iha rai-laran, ne’ebé entre Estadu ho orden médiku tenke serbisu hamutuk atu regula,
“Projetu-lei ne’e nia konteúdu atu harii orden médiku ba médiku sira iha Timor sira-nia orden. Harii orden ne’e no aprova sira-nia estatutu, ne’ebé aban bainrua kuandu orden ne’e moris hotu-hotu iha Timor hakarak sai médiku, hotu-hotu iha Timor hakarak atu serbisu hanesan médiku iha rai-laran atu ospitál ka ne’ebé de’it tenke kumpre estatutu lei ne’e aprova,” noa esplika.
Faze dahuluk tenke inskreve, depois ida-ne’e mak obrigasaun no iha direitu estatutu ne’e mós fó.
Prezidente komisaun A ne’e fó sai katak projetu-lei ne’e iha artigu hamutuk 100-resin.
Jornalista : Nelson de Sousa
Editór : Cancio Ximenes
