Kondisaun estrada difikulta, sentru saúde Lacluta distribui ai-moruk ba postu-sira
VIQUEQUE, 29 maiu 2023 (TATOLI)— Xefe Sentru Saúde Postu Lacluta, munisípiu Viqueque, Bendito Soares, informa kondisaun estrada aat difikulta ba sentru saúde postu Lacluta, munisípiu Viqueque hodi halo distribuisaun ai-moruk ba postu saúde sira.
“Iha postu Lacluta difikuldade ne’ebé ami hasoru maka estrada liuliu tempu udan, ami distribui ai-moruk ba postu saúde iha Luan Rai-Kuak ne’e susar tebes. Dala ruma pasiente balun moras grave husi ne’ebá ambulánsia tula mai sentru mós difisil tebes tanba kondisaun estrada grave tebes”, hateten Bendito Soares, ba jornalista sira, iha sentru saúde Lacluta, kuarta ne’e.
Nune’e, resposavél ne’e husu ba ministériu kompetente liuliu Ministériu Obra Públiku (MOP) atubele reabilitasaun ba dalan hirak ne’e atubele fasilita kobertura liuliu distribuisaun ai-moruk ba fasilidade saúde sira.
“Ho kondisaun estrada ne’e, Ha’u selu ema nia-kuda mak lalin ai-moruk ba iha postu saúde sira. Ema balun oferese sira-nia kuda maka ami fó osan ba sira hodi lori ai-moruk sira ba postu saúde hodi atende ba pasiente sira”, nia afirma.
Biban ne’e, nia relata hahú janeiru to’o marau ne’e sentru saúde Lacluta rejista kazu moras infesaun respiratóriu aguda (ISPA) na’in-792.
Tuir dadús kazu moras rejista iha sentru saúde postu Lacluta hanesan diáreia 73, moras pneumonia 50, tee been ho raan ualu no moras seluk 1.192.
“Husi moras sira-ne’e, ami fó tuir protokolu saúde nian no ami nafatin fó tratamentu ba pasiente sira. Kazu ISPA númeru aas tanba kauza husi rai-rahun dalan ruma ita-nia komunidade sira hemu bee matak, entaun sira hetan moras ISPA, maibé ami nafatin fó asisténsia saúde to’o sira rekuperadu”, katak.
Daudaun ne’e, nia afirma sentru saúde Lacluta iha estoke ai-moruk sufisente hodi fó atendimentu ba abitante sira iha postu Lacluta.
Tuir dadús prosesaun sensu husi Ministériu Saúde (MS) iha tinan 2022, postu Lacluta totál abitantente 7.141 no sentru saúde postu Lacluta iha ninia postu saúde hamutuk haat no maternidade ida. Postu Lacluta suku haat kompostu husi suku Dilor, Uma-Tolu, Ahic no Laline.
Enkuantu, pesoal saúde serbisu ne’ebé iha sentru saúde Lacluta na’in-41, kompostu husi médiku na’in-haat, Enfermeiru na’in-11, asistente enfermeiru na’in-haat, parteira na’in-neen, analista na’in-ida, farmasista na’in-haat no tékniku no seguransa na’in-13.
Jornalista : Vitorino Lopes da Costa
Editór : Florencio Miranda Ximenes
