BAUCAU, 30 marsu 2023 (TATOLI) – Autoridade Administrasaun Munisipál Baucau, kinta ne’e, selebra kontratu ho kompañia manan-na’in hodi implementa projetu Planu Dezenvolvimentu Intergradu Munisipál (PDIM) tinan 2023.
Kompañia tolu ne’e hanesan Olhão Unipesóal, Lda sei responsabiliza projetu reabilitasaun eis edifísiu postu administrativu Baucau vila, Caidaralata unipesóal, Lda no kompañia Lanisia unipesóal, Lda responsável obra edifísiu patrimóniu lojístika administrasaun Baucau.
Prezidente Autoridade Munisipál Baucau, Olivio Bou-Lesa Freitas, husu kompañia sira atu ezekuta projetu ho responsabilidade no kumpre desizaun hotu bazea ba kontratu, liuliu halo obra ho kualidade.
“Ita (Baucau oan), simu ona responsabilidade ida, nune’e tenke prienxe rekizitu hotu tuir kontratu ne’ebé asina hodi hala’o projetu ne’e ho kualidade,” Prezidente Autoridade Munisipál Baucau hateten iha Vila Nova.
Projetu tolu refere implementa no sai patrimómiu munisípiu Baucau nune’e tenke bazea ba dezeñu no Bill of Quantity (BoQ) tanba nu’udar Prezidente Autoridade Munisipál iha devér hapara kontratu ba kompañia sira kuandu durante implementasaun kontra regra normál hotu.
Kompañia responsável projetu tolu sei hala’o obra ho durasaun kontratu hamutuk tinan-ida ne’ebé parte autoridade deside orsamentu pursentu 39 mak sei gastu iha tinan-ne’e no pursentu 61 sei kontinua reapropria ba tinan-2024.
Diretór PDIM Baucau, Hermenegildo Rodrigues Fraga, husu atu kompañia sira labele troka enjeñeiru sira durante implementasaun projetu tanba bele fasilita funsionáriu sira halo verifikasaun iha terrenu.
“Husu kompreensaun diretór kompañia sira atu la’o-tuir prosesu ne’ebé iha ona,” Hermenegildo Fraga hateten.
Projetu tolu refere ho orsamentu hamutuk $250.303 ne’ebé fahe ba reabilitasaun eis edifísiu postu Baucau Vila hamutuk $58.000, konstrusaun edifísiu serbisu edukasaun munisipál Baucau $135.762 no konstrusaun edifísiu patrimóniu no lojístika hamutuk $56.541.
Jornalista : Natalino Belo
Editór : Evaristo Soares Martins
