CNE konvida órgaun eleitorál internasionál fahe esperiénsia kona-ba prosesu eleitorál

DILI, loron 30 marsu (TATOLI)—Komisaun Nasionál Eleisaun (CNE) sei hala’o, konferénsia internasionál ho envolvimentu hosi peritu sira hosi órgaun eleitorál internasionál hanesan rede órgaun jurisdisionál no administrasaun eleitorál hosi Comunidade País da Língua Portuguesa (CPLP), Komisaun Eleisaun Jerál (KPU-sigla Indonézia), Komisaun Nasionál Eleisaun hosi Indonézia no Komisaun Eleitorál Tailándia nian.
“Peritu sira-ne’e sei mai fahe sira-nia esperiénsia kona-ba prosesu eleitorál no mós sei ko’alia kona-ba promosaun pás no estabilidade iha períodu kampaña eleitorál,” Prezidente CNE, Jose Agostinho Belo, hateten ba joranlsita sira iha salaun Sentru Komunikasaun Sosiál CNE, Colmera, kinta ne’e.
Nune’e, CNE kontinua konvida peritu sira hosi órgaun eleitorál sira atu fahe sira-nia esperiénsia kona-ba implementasaun.
“Ami konvida organizasaun internasionál oin-oin atu fahe sira-nia esperiénsia kona-ba sira-nia servisu, pás, estabilidade, reprezentante partidu polítiku sira, akadémiku sira, estudante sira, iha país ne’e kona-ba eleisaun sira,” nia dehan.
Responsavél dehan Komisaun Nasionál Eleisaun hosi Indonézia sei fahe supervizaun no monitorizasaun ba faze tomak prosesu eleitorál nian.
Rede órgaun jurizdisional no administrasaun eleitorál hosi komunidade país lian portugés nian sira sei ko’alia kona-ba kontribuisaun no jestaun kona-ba realizasaun eleisaun nian iha Estadu membru ida-idak ne’ebé hala’o iha respeitu rigorozu ba kuadru Konstitusionál no legál sira no tuir padraun internasionál ne’ebé aseitavél.
Nune’e, Prezidente CNE sei organiza ho di’ak prosesu tomak hodi fó susesu ba rezultadu eleisaun lejislativa.
Jornalista : Osória Marques
Editór : Cancio Ximenes

