DILI, 30 marsu 2023 (TATOLI)—Sekretáriu Jerál Adjuntu Parlamentu Nasionál, João Rui Amaral, informa to’o oras ne’e estudu viabilidade ba konstrusaun edifísiu foun PN seidauk bele realiza tanba seidauk iha rai fiksu ne’ebé Governu atu atribui.
Notísia Relevante: PN aprova fatin harii edifísiu própriu
“Parlamentu ami aloka hela iha orsamentu privativu atu halo estudu viabilidade, depois iha fundu infraestrutura ninian PN tau iha ne’eba millaun $1-resin, maibé to’o agora ami labele ba foti tanba buat hotu tenke liuhosi estudu viabilidade mak ita bele hala’o. Nune’e, estudu viabilidade ne’e ita bele konkretiza kuantu iha terrenu ne’ebé mak fiksu mak ita foin halo no agora seidauk iha terrenu fiksu,” nia hateten ba jornalista sira iha kna’ar fatin, PN, kinta ne’e.
Nia hateten, hanoin atu harii edifísiu foun PN hosi kedas lejislatura sira liubá maibé la konsege no to’o lejislatura atuál tau ona orsamentu atu halo estudu viabilidade no konstrusaun ne’ebé hein rai indika hosi Governu.
Nia dehan, uluk iha Tasi-Tolu mós ita haree hotu ona no iha lejislatura daruak konsege duni halo estudu viabilidade maibé depois polítika iha lejislatura tuir mai muda fila-fali.
“Ne’ebé, to’o ohin loron, naton iha Caicoli rezolusaun sai tiha ne’e mós Governu la fó, ikus mai hatudu fila-fali iha Halidolar ba iha ne’eba mós dehan atu muda fali ba sidade administrativa iha Metinaro, entaun to’o ohin loron la klaru liu,” nia hateten.
Prezidente PN atuál esforsu tebes tenta komunika ho entidade relevante, inklui pedidu lubun hato’o ba Governu maibé to’o daudaun seidauk hetan fali resposta.
Notísia Relevante: Edifísiu foun PN no rezidénsia ba deputadu sira sei konstrui iha Hera
Jornalista : Nelson de Sousa
Editór : Cancio Ximenes
