DILI, 30 marsu 2023 (TATOLI) – Komandu Jerál Polísia Nasional Timor-Leste (PNTL) serbisu hamutuk ho Polísia Federál Austrália (APF, sigla inglés), Sosiedade Sívil no Sívita akadémika, realiza workshop hodi halo konsultasau Planu estratéjiku PNTL hodi aprezenta kona-ba dezenvolvimentu sustentavel ba périodu 2022-2030.
Vise-Ministru Interiór (VMI), António Armindo kongratula komponente hotu ne’ebé envolve iha elaborasaun Planu Estratéjiku ne’e.
“Ha’u hakarak fó parabéns ba ekipa traballu hodi halo ona esbosu planu estratejia PNTL ne’ebé dezenvolve hosi Timor-Leste Police Developmant Program (TLPDP), PNTL no envolve mós ha’u-nia gabinete hodi elabora dokumentu importante sira ba modernizasaun instituisaun PNTL”, António Armindo hateten, liuhosi komunikadu ne’ebé TATOLI asesu, kinta ne’e.
Elaborasaun planu ne’e sei envolve mós parseiru dezenvolvimentu sira, hahú hosi sosiedade sívil no akademista sira atu tau hamutuk hanoin ne’ebé konstrutivu hodi apoiu hare ba planu ne’e rasik.
“Iha programa tolu ne’ebé sai hanesan prioridade maka primeiru Boa governasaun, segundu seguransa nasionál no terseiru maka igualdade jéneru no inkluzaun. Programa tolu ne’e jerál maibé tenke defini ona ida ne’ebé mak fasil atu implementa,” nia tenik.
Tuir Governanante ne’e, sei iha tan programa barak no sub-programa ne’ebé atu hala’o, tanba ne’e husu ba kada komandu PNTL sira hotu atu kuñese di’ak programa ne’ebé kada tinan halo.
Iha sorin seluk Komandante Jerál PNTL, Komisáriu-Jerál Polísia, Henrique da Costa, hateten dezenvolvimentu PNTL presiza apoiu hosi ema hotu.
“PNTL iha rihun haat entaun iha momentu ida ne’e ita sira iha ne’e selesionadu hodi reprezenta sira hodi fó hanoin ba dezenvolvimentu PNTL nian tantu iha kurtu prazu no longu prazu. Ba parte akademista no sosiedade sívil sira katak dezenvolvimentu PNTL la’ós ami mesak maibé ita hotu tau hanoin hamutuk oinsá atu hasa’e kapasidade PNTL hodi fornese servisu ne’ebé importante no estabelese kredibilidade ba PNTL tanba Planu Estratéjiku Dezenvolvimentu ne’e sei utiliza ba tempu naruk nian”, Lider másimu PNTL dehan.
Tuir nia, dokumentu ne’ebé sei diskute inísia hosi Komandante Jerál sesante Komisáriu Faustino da Costa, maibé seidauk finaliza tanba ne’e nia parte konvida komponente hotu atu kontribui idea hodi halo di’ak liutan planu ne’e.
“Ita konvida Komandante PNTL Munisipál sira, Unidade, Xefi Departamentu, Xefi Gabinete balun inklui mós sosiedade sivíl no akadémiku sira hodi partisipa iha ita-nia aprezentasaun kona-ba planu estratéjiku atu haree prioridade iha instituiusan PNTL nia laran nune’e bele hetan komentáriu ruma kona-ba dokumentu hirak ne’e husi ne’e mak aprezenta fali rezultadu ba governu hodi deside,” nia hatutan.
Entidade masima PNTL ne’e mós kongratula ekipa elaborasaun planu estratéjiku ida ne’e tanba planu ida ne’e ajusta tuir progresu dezenvolvimentu global, rejional no rai-laran nian.
Hafoin remata semináriu ne’e, tuir planu iha inisiu fulan abril nia laran sei submete fali hodi prepara no distribui relatóriu konsultasaun workshop nian hafoin sei halo lansamentu iha loron 17 abril 2023 hodi promove planu estratéjiku PNTL nian.
Iha fulan jullu sei fasilita konsultasaun no identifika asaun sira, fulan setembru nia laran sei dezenvolve no hetan konsellu kona-ba Planu Asaun Anuál (PAA) PNTL nian no orsamentu enkuantu iha fulan novembru sei finaliza no submete PAA PNTL nian hamutuk ho orsamentu.
Hola parte iha semináriu ne’e Segundu Komandante Jeral PNTL, Komisáriu Polísia, Pedro Belo, Komandante TLPDP, Darren Booy, Inspetór Jeral PNTL, Komandante Administrasaun, Xefi SIPN, Xefi Planeamentu, Xefi Jeneru no Komandante Munisipiu sira.
Atividade ne’e hala’o durante loron ida iha Akadémika PNTL Comoro, Dili.
Jornalista : Hortencio Sanchez
Editór : Rafael Ximenes de A. Belo
