Kondisaun estrada difikulta povu Babulu lori produtu ba merkadu no asesu ba saúde
VIQUEQUE, 30 marsu 2023 (TATOLI)— Xefe Suku Babulu, Postu Administrativu Uatulari, Munisípiu Viqueque, Mario Trindade, hateten estrada mak sai alternativu ba prosesu hotu, liuliu populasaun atu halo moviementu ho transporte privadu no públiku hodi lori produtu lokál sira ba merkadu, nune’e bele nesesita moris lor-loron.
Kondisaun estrada ne’ebé aat iha suku Babulu no komunidade iha Afolikai ne’ebé lokaliza iha área remota mak hanesan Haenaudere no Iraler, Matahoi labele lori produtu lokál merkadu.
“Dadaun ne’e, ita haree rasik kondisaun estrada hanesan tahu dook loos, ne’ebé komunidade labele halo movimentu liuliu uza transporte privadu no públiku hodi asesu ba merkadu”, Autoridade lokál ne’e hateten ba jornalista sira iha suku Babulu, postu Uatulari, kinta ne’e.
Produtu lokál ne’ebé komunidade iha área refere prodús mak hanesan modo, kamii, nuu no produtu seluk maibé labele lori ba merkadu hodi hetan osan ba nesesita moris lor-loron nian.
“Ho kondisaun estrada ne’e, foin lalais, karreta tuck tula materiál konstrusaun fabrikanu mai aldeia Liaside la konsege to’o iha fatin konstrusaun, tanba baku-fila iha dalan klaran tanba dalan tahu dodok no namdoras loos”, nia lamenta.
Daudaun ne’e, nia dehan maske iha suku Babulu iha hela implementa projetu Uma Naroman ba Povu UMP plus A, Uma Naroman ba Povu regular, projetu dada bee-moos, maibé kondisaun estrada maka seidauk hadi’ak. Enkuantu, dalan ligasaun postu Uatulari to’o Irale purvolta kilometru 31 ho kondisaun grave tebes.
Entretantu, ho kondisaun estrada ne’e la’ós difikulta de’it ba populasaun, maibé difikulta mós manorin na’in sira-nia ba hanorin estudante sira iha área rurál hanesan EBC Haenaudere tanba tempu udan profesór sira labele ba hanorin tanba halo movimentu ladi’ak.
Diretór EBC Hanaudere, Aquilis Martinho, hateten profesór maioria hosi fatin dook maka dezloka ba eskola inklui estudante ne’ebé kondisaun estrada difikulta movimentu professor no estudante.
“Tanba ne’e, maka ami hakarak husu ba parte relevante sira atu hadi’a netik dalan sira-ne’e. Nune’e labele difikulta ba atividade lor-loron ba fatin serbisu ida-ne’e maka ami sujere”, nia hato’o.
Aleinde ne’e, Enfermeiru iha postu Saúde Nunu-Malau, Lucas Mateus Pereira, reforsa kondisaun estrada ne’e mós difikulta sira atu ba halo atendimentu saúde ba komunidade sira ne’ebé hetan moras no presiza tratamentu urjete.
“Ho kondisaun estrada ne’e, ami la’o ain mak ba serbisu iha postu saúde, maibé iha kazu emerjénsia ruma mosu ami tenke ba halo atendimentu lais. Maibé atu lori ba sentru saúde labele tanba dalan ladi’ak no ambulásia labele tula. Nune’e iha kazu emerjénsia ruma família sira mak hulan mai de’it sentru saúde hodi hetan tratamentu”, nia lamenta.
Hataan ba kestaun, Diretór Serbisu Obra Munisípiu Viqueque, Mario do Rego, hateten halo normalizasaun ba dalan sira liga ba área rurál ne’e, pedidu antes ne’e haruka ba Ministériu Obra Públiku (MOP), nune’e ministériu fó ona despaisu ba IGEADE, I,P liuhosi Brigada Daitula Baucau mak atu mai normaliza.
“Ita nia pedidu ne’e hetan ona aprovasaun no ministériu orienta ona IGEADE,I.P maka sei mai halo normalizasaun ka hadi’a,” nia afirma.
Jornalista: Vitorino Lopes da Costa
Editór : Florencio Miranda Ximenes
