Makikit Laulara provizóriu ukun tabela klasifikasaun LFTL
DILI, 30 marsu 2023 (TATOLI) – Armada ho naran istimadu Makikit Laulara alias AD SLB provijoriu ukun tabela klasifikasaun Liga Futeból Timor-Leste (LFTL) ho pontu 11 bainhira manán armada Assalam ho rezultadu 2-1 iha Estádiu Munisipál Dili, kinta lorokraik.
Hosi rezultadu ne’e lori ekipa Makikit ne’e loke liras nahe aan hodi semo loko aan aas liu hotu ona ekipa ualu seluk ne’ebé hamriik de’it iha okos hodi hateke tuir.
Bainhira jogu hahú iha kampo laran be nahe aan ho duut matak be mamar nia leten, Makikit hatudu kedan nia forsa no abilidade ne’ebé iha hodi halo jogu bonito nune’e iha minutu 1 jogadór defeza SLB ichel Hutabarat (26) aproveita bola barullu iha lina oin lansa kedan golu ba rede Assalam muda rezultadu ba 1-0.
Hosi golu ne’e halo adeptu SLB nian halo rame liutan jogu ne’e ho lian maka’as hodi hakilar fó Gloria ba sirania ekipa favoritu ne’ebé lideradu hosi lider karismatiku Kay Rala Xanana Gusmão.
Estádiu Munisiopál Dili nakfilak ba ema rihun ba rihun kompara ho jogu sira antes ne’e, hetok liu tan jogu sira hosi segunda divizaun ne’ebé laiha liu adeptu maibé jogu SLB ho Assalam ne’e adeptu hakonu tiha iha tribun leten. Tribun, husi monok nakfila sai ‘barullu’.
Maske golu ona armada Assalam la nonok de’it kontinua hatudu jogu ne’ebé brillante atu halo empata jogu ne’e. Téknika kontra téknika. Estratéjia hasoru estratájia.
Esforsu hotu sira halo maibé sutu hirak avansadu sira halo seidauk kona iha alvu no sutu balu guarda rede konsege baku sai.
Maibé tekiteki iha minutu 33 sorte di’ak monu duni ba Assalam liuhosi jogadór Martinho Belo (33) konsege utiliza jogu individu hodi fintas defeza na’in rua SLB nian hodi lansa kedan sutu ho velosidade maka’as halo guarda rede SLB tuda aan sala bola tama liu ba rede laran muda rezultadu ba 1-1.
Hosi rezultadu ne’e halo jogu sai manas liu tan tanba ekipa rua tenke servisu makaas liutan atu prodús golu nune’e bele manán jogu ne’e.
SLB hala’o jogu ne’ebé masimu tebes liuhosi avansadu no defeza sira, nune’e iha minutu 45+2 jogadór Jenivio Mota (7) halo jogu individu hodi fintas ba fintas mai sikat defeza na’in haat Assalam nian hodi lansa kedan sutu ida bola tama liu ba rede laran ikus muda rezultadu ba 2-1.
Hosi golu ne’e hanesan golu ikus ba ekipa rua iha minutu primeira parte no ekipa rua tenke deskansa minutu 15 hafoin kontinua luta fila fali iha kampo laran.
Hakur ba segunda parte ekipa rua nafatin lansa kontra no atake tuir tékniku no abilidade ekipa idaidak nian tanba Assalam hakarak buka halo empata no manán maibé SLB hakarak aumenta tan golu hodi xave metin pontu tolu.
Esforsu hotu Assalam halo hodi domina bola iha kampo laran halo jogadór SLB book aan la di’ak maibé esforsu hirak ne’e hela de’it hanesan esforsu tanba la konsege marka golu ruma.
Kontra no atake ne’ebé ekipa rua halo hela de’it hanesan kontra no atake tanba minutu 90 termina laiha tan golu ruma mak akontese maske árbitru adisionál tan minutu 6 maibé rezultadu nafatin mantein ho 2-1 ikusmai SLB mak iha direitu absoluta ba selebra vitória ho pontu tolu Assalam hela ho derrota no pontu mamuk.
Eskuad SLB:
Andrew Mensah (13), Bakayoko Ozi (2), Michel Hutabarat (26), Jhon Frith de Oliveira (6), Cristovão Fernandes (23), Filipe de Oliveira (24), Gumario Morreira (5), Jermias Baptista (69), Kornelis Portela (11), Alexandro Kefy (21), Zenivio Mota (7).
Suplente:
Filonito Nougueira (12), Thomas Sarmento (4), Natalino da Costa (8), Fernando de Carvalho (3), Aldo Amaral (19), Domingos Ribeiro (22), Alexandro Lemos (9), Norberto Goncalves (14), Vabio Pires (28), José Pinto (27), Marques de Carvalho.
Treinadór: João Paulo
Eskuad Assalam:
Junildo Pereira (1), Martinho Belo (33), Husen Costa (27), Herminio de Sousa (14), Lourenso Freitas (19), Francisco da Costa (28), Elis Mesquita (10), Feliciano da Costa (92), Celcio Pereira (88), Daniel Appiah (11), Adika Godwin (13).
Suplente:
Nathaniel Agbozo (30), Hasan Costa (7), Bonarudin Amin (17), Anisio Boavida (16), José Soares (5), Tirjon Maia (15), Alexandro Miranda (26), Rahmatuliah Ghanizada (9), Alexandre Weber (70).
Treinadór: Gaspar Amaral
Jogu ne’e dirije hosi árbitru prinsipál Pedro Carvalho, juiz liña Antonio Carvalho, Ivo Monis no árbitru rezerva Francisco Pereira.
Tabela klasifikasaun provijoriu primeira divizaun
- AD SLB ho pontu 11
- Assalam ho pontu 8
- Porto Taibessi ho pontu 7
- Ponta Leste ho pontu 7
- Karketu Dili ho pontu 6
- Emmanuel ho pontu 6
- Academica ho pontu 5
- Ultramar ho pontu 4
- Aitana ho pontu 4
Hosi pontu ne’ebé iha hatudu katak SLB iha posibilidade atu hakat ona ba kampiaun LFTL maibé ekipa seluk hanesan Porto Taibessi, Assalam, Ponta Leste no Karketu duni tuir hela tanba sei hela jogu balu haat no balu lima hodi termina.
Jornalista : Hortencio Sanchez
Editór : Rafael Ximenes de A. Belo
