STAE prepara sentru votasaun ambulante ba pesoál saúde, pasiente no prizioneiru

DILI, 31 marsu 2023 (TATOLI)— Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten, STAE prepara ona sentru votasaun ambulante atu pesoál saúde, pasiente no prizoneiru sira bele ezerse direitu votu iha eleisaun parlamentar ne’ebé akontese iha 21 maiu 2023.
“Lei ejiste hodi kontinua implementa sentru votasaun ambulante ne’ebé sei aplika ba médiku ka pesoál saúde no pasiente bele halo votasaun iha ospitál nasionál no referál sira no mós ba iha prizoneiru sira halo vota iha prizionál sira”, Diretór STAE ne’e hateten ba Agência TATOLI iha kna’ar fatin, Dili, sesta ne’e.
Atu fasilita sentru votasaun ambulante ne’e, STAE halo ona komunikasaun ho Ministériu Saúde no Ministériu Justisa hodi halo despaisu atu fasilita ekipa sira bele submete lista eleitór-sira.
“Halo kooperasaun téknika ho diresaun jerál ne’ebé mak tomak konta kona-ba internadu sira iha HNGV no ospitál referál inklui Ministériu Justisa atu aprezenta lista no dadus sira to’o loron 10, molok to’o eleisaun parlamentár nian”, nia afirma.
Alende ne’e, STAE mós prepara sentru votasaun ambulante ba seguransa sira hanesan Polísia Nasionál Timor-Leste (PNTL), FALINTIL Forsa Defeza Timor-Leste (F-FDTL).
“Ita mós komunika ona ho parte CNE no F-FDTL tanba tuir lei mós fó dalan ba ajente seguransa ne’ebé mak halo kna’ar iha ámbitu eleisaun, konserteza atu ezerse sira-nia votu iha ne’ebé deit, ita mós komunika ona ba komandu rua ne’e”, nia informa.
Jornalista hosi mídia privadu la vota livre
Diretór Acilino hateten ba jornalista mídia privadu sira tenke bá halo votasaun tuir sira-nia área jeografia tanba alterasaun lei eleisaun parlamentár seidauk hetan promulgasaun hosi Prezidente Repúblika.
“Infelizmente alterasaun lei ne’ebé la hetan promulgasaun husi Xefe Estadu. Nune’e mak jornalista sira ne’ebé mak la’ós serbisu iha mídia públika ne’e tenke ba vota tuir ninia unidade jeográfika, maibé hanesan TATOLI no RTTL ne’e vota livre,” nia afirma.
Ho asuntu ne’e, Prezidente Konsellu Imprensa Timor-Leste, Otelio Ote, afirma sei haruka karta ba Sekretariádu Tékniku Administrasaun Eleitorál (STAE), hodi fó autorizasaun ba mídia nasionál-sira hodi tuir votasaun livre atu bele fasil halo kobertura.
“Konsellu Imprensa sei haruka karta ba STAE hodi husu autorizasaun atu jornalista sira ne’ebé serbisu iha média privadu sir abele tuir votasaun livre ka iha fatin ne’ebé de’it,” Prezidente ne’e hateten.
CI husu ba mídia nasionál sira atu prepara lista jornalista ne’ebé mak atu halo kobertura iha eleisaun lejizlativa 2023.
“Tanba semana oin iha programa forum editoriál, ita sei konvida STAE atubele ko’alia kona-ba asuntu refere, nune’e fó biban ba jornalista sira hodi vota iha fatin ne’ebé de’it,” nia hateten.
Iha eleisaun parlamentar ne’e, Ote dehan, ekipa análiza mídia nian kontinua servisu atu kontrola publikasaun mídia sira no mós halo monitorizasaun iha terreñu hodi hatene jornalista sira-nia serbisu tuir kódigu etika.
Jornalista: Osória Marques
Editór : Florencio Miranda Ximenes

