iklan

NASIONÁL, HEADLINE, POLÍTIKA

Taur bolu ministru na’in-tolu hodi aborda planu harii doka ba ró-ahi

Taur bolu ministru na’in-tolu hodi aborda planu harii doka ba ró-ahi

Primeiru-Ministru, Taur Matan Ruak. Imajen Tatoli/Francisco Sony

DILI, 31 marsu 2023 (TATOLI) – Primeiru-Ministru (PM), Taur Matan Ruak, konvoka reuniaun ho Ministru Defeza, Filomeno da Paixão, Ministru Transporte no Komunikasaun, José Agustinho, no Vise-Ministru Interiór, António Armindo, hodi koalia kona-ba proposta investimentu ida iha área tasi nian, ho kapasidade atu harii flutuante ida iha Karavela-Baucau no hari’i doka ida atu halo manutensaun ba ró-ahi no embarkasaun sira.

“Progresu ba konstrusaun estaleiru ne’e ninia estudu viabilidade daudaun iha hela konkursu públiku iha Komisaun Nasionál Aprovizionamentu, maibé iha ona faze finalizasaun relatóriu kuandu ramata bele hahú. Hosi estudu ne’e planeia harii iha Karavela no seluk besik Portu Tibar”, Ministru José Agustinho informa iha Palásiu Governu, sesta ne’e.

Ministru Transporte no Komunikasaun, José Agustinho da Silva. Imajen Tatoli/Egas Cristóvão

Maski Governu deside ona fatin rua ba konstrusaun doka, maibé governante ne’e afirma katak depende ba rezultadu estudu viabilidade hatudu fatin ida ne’ebé mak merese atu halo.

Ministru Transporte no Komunikasaun ne’e salienta katak ba konstrusaun refere ne’e iha timoroan balun ne’ebé mak manifesta vontade atu halo investimentu hamutuk ho Governu tanba iha kapasidade téknika no finanseira.

“Tanba iha timoroan balun interrese ba investimentu ne’e maka Primeiru-Ministru konvida ami na’in-tolu ko’alia sobre asuntu ne’e”, nia afirma.

Governante ne’e esplika katak, durante ne’e iha ministériu sira hanesan Transporte no Komunikasaun, Interiór, Defeza, Saúde no Agrikultura no Peska mak iha ró-ahi no kada tinan tenke halo manutensaun iha rai-li’ur, nune’e gasta orsamentu barak, entaun Governu haree ba despeza sira ne’e maka planeia hodi kria rasik nia infraestrutura.

Daudaun ró-ahi ne’ebé jere hosi Governu liuhosi Autoridade Portuáriu Timor-Leste (APORTIL) mak Berlin Nakroma no Ramelau.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!