DILI, 01 abríl 2023 (TATOLI)-Partidu Dezenvolvimentu Sosiál (PDS), sábadu ne’e, iha salaun Katedrál, Villa Verde, ofisialmente fó sai ba públiku nu’udar partidu polítiku foun ne’ebé eziste ho legalmente no livre hala’o atividade iha rai-laran.
Seremonia ne’ebé realiza hosi PDS ne’e ho tema “Hamutuk ho PDS haburas dezenvolvimentu hosi baze, hametin justisa, pás no dezenvolvimentu”.
Iha intervensaun, Prezidente Interinu PDS, Julio Sarmento “Meta-Malik”, hateten perante ba kuadru no militante sira katak, ohin atu konfirma katak ita hotu mak PDS.
“Iha ita-nia rai partidu barak, agora realidade obriga ita tenke hatudu diferensa ho sira seluk, PDS moris antes ne’e no konsege prienxe rekezitu hetan estatutu hosi Tribunál hala’o atividade ba oin. Labele garante PDS atu sai ministru, Deputadu maibé garante atu hasai povu hosi ki’ak, hanesan iha tema PDS ne’ebé iha, ida ne’e mak improtante”, hateten Prezidente Meta-Malik.
PDS harii iha tinan rua liu ba no iha tinan 2023 fulan hirak liu ba hetan ona legalidade hosi Tribunál Rekursu, no daudaun ne’e rejistu militante hamutuk rihun 22 iha territóriu laran.
“Iha tinan 20 nia laran, Timor-Leste laiha mudansa tanba komesa hosi ita-nia maun sira dudu malu, entaun ita tenke mosu ho diferensa pensamentu lójika iha rai ne’e ho sira seluk, labele sukat ho Xanana Gusmao, Mari Alkatiri ho sira seluk, maibé ita tenke halo diferensa no PDS sai sentru hodi hala’o dikusaun ba asuntu interese nasionál ho partidu hotu”, katak nia.
Tanba ne’e, Prezidente partidu ne’e, hateten mezmu PDS seida’uk kompete ho partidu sira seluk iha eleisaun Parlamentar tinan ne’e, maibé husu nafatin ba militante no kuadru sira serbisu de’it labele husu kolen hodi habo’ot liutan partidu ne’e hodi bele realiza mehi ne’ebé iha sai realidade katak hasai povu hosi ki’ak.
Meta-Malik agradese ba vontade militante no kuadru hosi territóriu laran ne’ebé ho dezáfiu oioin ikus mai partidu hetan estatutu legál hosi autoridade judisiáriu.
Iha parte seluk, Prezidente PDS ne’e hateten relasiona ho eleisaun Parlamentár 2023 estrutura partidu sei diskute atu apoiu partidu se, nune’e iha tempu tuir mai sei fó sai ba públiku.
“ha eleisaun mai 21 maiu, deside haree didi’ak, ita la kompete ho sira maibé karik sira presiza ita tama, katak ami mak ne’e. Tama parseiru hanesan kampu maibé laiha kompromisu atu sisi, hatudu ita nia simplisidade”, nia afirma.
Iha biban hanesan, Sekretáriu Jerál PDS, Benevides Correira Barros, dehan agradese ba estrutura munisípiu tomak no militante hotu tanba durante tinan tolu fó apoiu ba komisaun installadora atu rekolla dokumentu, nune’e iha 02 fevereiru Tribunál deklara PDS hetan estatutu difinitiva.
“La fasil harii partidu, mezmu hasoru dezáfiu oioin tanba prosedimentu la fasil, agradese no kongratula ba estrutura rekolla dokumentu, nune’e komisaun lori ba iha autoridade”, nia agradese.
Jornalista: Nelson de Sousa
Editor : Florencio Miranda Ximenes
